عمران خان خطاب میں یہی کہیں گے کسی کونہیں چھوڑوں گا، کسی کو نہیں بخشوں گا،قوم یہ سب پہلے سن چکی ہے‘مراد علی شاہ

اسلام آباد (رپورٹنگ آن لائن) وزیراعلیٰ سندھ سید مراد علی شاہ نے کہا ہے کہ عمران خان خطاب میں یہی کہیں گے کسی کونہیں چھوڑوں گا، کسی کو نہیں بخشوں گا،قوم یہ سب پہلے سن چکی ہے‘حکومت کو آئینی طریقے سے گھربھیجیں گے‘عمران خان کے اپنے کرتوت بخشوانے کا وقت آگیا ہے ‘پی ٹی آئی والے سندھ میں پکنک منانے نکلے ‘خالی کرسیوں سے خطاب کر رہے ہیں ‘اتحادی بھی اب حکومت پرالزامات لگارہے ہیں،پوری قوم کی آوازہے سلیکٹڈحکومت سے جان چھڑائی جائے۔

پیر کو وزیراعلیٰ سندھ مراد علی شاہ نے اسلام آباد احتساب عدالت کے باہر میڈیا سے گفتگو کرتے ہوئے کہاکہ حکومت کو آئینی طریقے سے گھربھیجیں گے،عمران خان کے اپنے کرتوت بخشوانے کا وقت آگیا۔انہوں نے کہاکہ عوام اب سلیکٹڈ حکومت کونہیں چھوڑے گی، پی ٹی آئی والے سندھ میں پکنک منانے نکلے ہیں، سندھ میں خالی کرسیوں سے خطاب کیاجارہاہے۔

وزیراعلیٰ سندھ کا کہنا ہے کہ امید ہے الیکٹڈ نمائندے پارلیمنٹ میں عوام کی آوازبنیں گے، اتحادی بھی اب حکومت پرالزامات لگارہے ہیں،پوری قوم کی آوازہے سلیکٹڈحکومت سے جان چھڑائی جائے۔ مراد علی شاہ کا مزید کہنا ہےکہ عمران خان نیازی کی حکومت کوجاناہوگا،اتحادیوں کوبھی عوام کی آوازپرلبیک کہناچاہیے۔ان کا کہنا تھا کہ بلاول بھٹوکا قافلہ جہاں سے جارہاہے لوگ شامل ہورہے ہیں۔ بلاول بھٹوبے حس حکومت کونیند سے جگائیں گے۔

وزیراعلیٰ سندھ نے مزید کہاکہ لانگ مارچ 8 مارچ کواسلام آبادپہنچے گا۔مراد علی شاہ نے کہا کہ وزیراعظم عمران خان خطاب میں یہی کہیں گے کسی کونہیں چھوڑوں گا، کسی کو نہیں بخشوں گا،قوم یہ سب پہلے سن چکی ہے۔