لاہور (رپورٹنگ آن لائن) صوبائی وزیر اطلاعات عظمیٰ بخاری نے کہا ہے کہ ہمیں جلسے سے نہیں پی ٹی آئی والوں کی کرتوتوں سے ڈر لگتا ہے،عمران خان جلسوں سے نہیں بلکہ اپنے اعمال کا حساب دے کر ہی جیل سے باہر آسکتے ہیں، بانی پی ٹی آئی کو این آر او نہیں ملے گا ،9مئی میرا یا مسلم لیگ (ن) کا ذاتی مسئلہ نہیں،ملکی سلامتی کے خلاف بغاوت ہے، 9 مئی کرنے اور کرانے والوں کو جواب دینا ہوگا۔
انہوں نے لاہور میں پریس کانفرنس کرتے ہوئے کہا کہ اسلام آباد میں ایک تماشہ کیا گیا، خیبرپختونخوا کے لوگوں کو نئے پاکستان کے نام پر ٹیکہ لگا، خیبرپختونخوا کے لوگوں کووہاں سے اٹھا کر جلسے میں لایا گیا، اللہ جانے جلسے میں شرکت کرنے کا کیا ریٹ ہوگا۔انہوں نے کہا کہ خیبرپختونخوا کے عوام کی بدقسمتی ہے ان کو علی امین گنڈاپور ملے ہیں، اگر یہ تماشے اور ڈرامے کرنے ہیں تو کے پی میں ہی کرلو، تماشہ اسلام آباد میں لگانے کی کیا ضرورت ہے۔
عظمیٰ بخاری نے کہا کہ یہ کہتے ہیں حقیقی آزادی چاہیے،کس سے چاہیے آپ کو حقیقی آزادی؟ امریکہ کے آپ پائوں پڑرہے ہیں،اسٹیبلشمنٹ سے آپ کو بات کرنی ہے، موصوف تاریخ کے انوکھے سیاستدان ہیں، نیب کے نئے قانون سے ریلیف مانگنے کیلئے بانی پی ٹی آئی کی پہلی درخواست آئی ہے، بانی پی ٹی آئی کو این آر او نہیں ملے گا۔
انہوں نے کہا کہ کل ایک اخبار دیکھا،اسرائیلی بھی بانی پی ٹی آئی کی محبت میں مرے چلے جارہے ہیں، کسی کو بھی فتنہ،فساد اور انتشار کی اجازت نہیں دی جائے گی، پی ٹی آئی کے جلائو گھیرائو کرنے پر کل بھی اعتراض تھا آج بھی ہے، ان کا اسلام آباد کا جلسہ صرف عمران خان کی رہائی کیلئے ہے، بانی پی ٹی آئی نے جلسے جلسوں سے نہیں عدالتی فیصلوں سے باہر آنا ہے۔انہوں نے کہا کہ ریاست سوئی نہیں ہوئی جو بھی جلسہ کرنے آرہے ہیں ان کو قانون کے مطابق آنا ہوگا، حالات خراب کرنے کے علاوہ آپ کو سب کچھ کرنے کی اجازت ہے۔
عظمیٰ بخاری نے دعوی کیا کہ خیبرپختونخوا میں دہشتگردوں کو سیف ہائوس دیئے گئے ہیں ، یہ ریاست کے لئے لمحہ فکریہ ہے، 9مئی میرا یا مسلم لیگ (ن) کا ذاتی مسئلہ نہیں،ملکی سلامتی کے خلاف بغاوت ہے، 9 مئی کرنے اور کرانے والوں کو جواب دینا ہوگا۔صوبائی وزیر اطلاعات کا کہنا تھا کہ گزشتہ حکومت نے آتے ہی بلدیاتی اداروں پر شب خون مارا تھا، مسلم لیگ (ن) کی حکومت میں جلد بلدیاتی انتخابا ت ہوں گے۔مولانا فضل الرحمان ہمارے بڑے ہیں کچھ بھی کہہ سکتے ہیں، مولانا فضل الرحمان نے فلور آف دی ہائوس کہا کہ حکومت کو فوری گرانا ٹھیک نہیں۔
پنجاب حکومت کے نیوٹریشن پروگرام کے حوالے سے عظمیٰ بخاری نے کہا کہ پنجاب حکومت نے کچھ دن قبل ڈی آئی خان سینیوٹریشن اینڈ میل پروگرام کا آغاز کیا، وزیراعلی مریم نواز اس مسئلے پر بہت سنجیدہ تھیں، کچھ لوگوں کو نیوٹریشن اینڈ میل پروگرام پر بھی اعتراض ہورہا ہے، ان کے گند بکھیرنے سے کوئی فرق نہیں پڑتا، ان کی بیگمات بھی قومی خزانے سے لوٹتی رہی ہیں۔
انہوں نے مزید کہا کہ ہم سے پہلے ایک وسیم اکرم پلس نام کی شخصیت موجود تھی، آج کل وہ مسٹر بین اور چارلی چپلن کی شکل میں نظر آتے ہیں، ڈی جی خان کے لوگوں کو ان سے کوئی سہولت نہیں ملی۔
