لاہور(رپورٹنگ آن لائن)ترجمان وزیراعلی پنجاب فیاض الحسن چوہان نے کہا ہے کہ جو لوگ اللہ اور اس کے رسولۖ پر ایمان رکھتے ہیں جنہوں نے انسانوں کو انسان کی غلامی سے نکال کر ایک اللہ اور رسول کی غلامی کی تعلیم دی وہ عمران خان کے حقیقی آزادی مارچ میں بھرپور شرکت کریں گے ،عمران خان اسلامی دنیا کا وہ واحد لیڈر ہے جس نے اقوام متحدہ میں ناموس رسالت ۖ کی جنگ لڑی اور توہین رسالت کے حوالے سے قرار داد منظور کروائی۔
حقیقی آزادی مارچ کے استقبال کی تیاریوں کے سلسلے میں منعقدہ ورکرز کنونش سے خطاب کرتے ہوئے انہوں نے کہا کہ پاکستان کی تاریخ میں پہلی مرتبہ عمران خان کی ہدایت پر پنجاب کی صوبائی کابینہ نے نکاج نامہ میں ختم نبوت ۖ کے حلف نامے کو قانون کا حصہ بنایا- فیاض الحسن چوہان نے کہا کہ پاکستان تحریک انصاف کے چیئرمین عمران خان اپنے بیٹوں کو وزیراعظم بنانے اور اپنے کیس معاف کرانے کی جدوجہد نہیں کر رہے بلکہ پاکستان کے عوام پر مسلط کی گئی چوروں، لٹیروں اورڈاکوئوں کی امپورٹڈ حکومت سے نجات دلانے کے لئے حقیقی آزادی مارچ کی قیادت کر رہے ہیں
انہوں نے کہا کہ عمران خان جیسے لیڈر صدیوں بعد نصیب ہوتے ہیں اور راولپنڈی کے عوام کا شعور بتا رہا ہے کہ وہ میزبانی کا حق ادا کرتے ہوئے حقیقی آزادی مارچ کا شایان شان استقبال کریں گے – فیاض الحسن چوہان نے کہا کہ حقیقی آزادی مارچ کی آمد سے قبل مری روڈ پر مزید استقبالیہ کیمپ بنا دیئے جائیں گے جہاں عوام کا سمندر اپنے قائد عمران خان پر پھولوں کی پتیاں نچھاور کے بھرپور استقبال کریں گے – انہوں نے کہا کہ انشا اللہ راولپنڈی کے عوام بھرپور جذبے سے مثالی میزبانی کا حق ادا کریں گے – انہوں نے وفاقی حکومت کی بعض ایجنسیوںکی مری روڈ پر آویزاں بل بورڈ اور ہورڈنگز اتارنے کی کاروائی کی شدید مذمت کی ۔
