اسلام آباد (رپورٹنگ آن لائن)وفاقی وزیر برائے مواصلات عبدالعلیم خان نے خیبر پختونخوا میں نئے ٹول پلازے قائم کرنے کی ہدایت کرتے ہوئے کہا ہے کہ ٹول پلازوں سے حاصل آمدنی خیبر پختونخوا کے شاہراتی نظام پر خرچ ہوگی،محصولات کی وصولی ترقیاتی اور مرمتی منصوبوں کے تسلسل کے لیے ناگزیر ہے،ٹول پلازوں پر توڑ پھوڑ برداشت نہیں کی جائے گی، ملوث افراد کے خلاف سخت قانونی کارروائی ہوگی۔
وہ جمعہ کو اجلاس کی صدارت کر رہے تھے۔این ایچ اے حکام نے اجلاس میں جاری منصوبوں اور مالی واجبات پروفاقی وزیر کو بریفنگ دی۔عبدالعلیم خان نے ہدایت کی کہ خیبر پختونخوا میں نئے ٹول پلازے قائم کیے جائیں،خیبر پختونخوا حکومت سے ٹول پلازوں کے قیام کیلئے رابطے کیا جائے۔ انہوں نے کہا کہ ٹول پلازوں سے حاصل آمدنی خیبر پختونخوا کے شاہراتی نظام پر خرچ ہوگی ،صوبے میں جمع ہونے والی رقم سے مقامی ترقیاتی منصوبوں کو فروغ دیا جائے گا ،محصولات کی وصولی ترقیاتی اور مرمتی منصوبوں کے تسلسل کے لیے ناگزیر ہے۔وفاقی وزیر عبدالعلیم خان نے کہا کہ ایک کروڑ روپے سے زائد واجبات والے منصوبوں کی انسپیکشن لازمی کی جائے۔
انہوں نے کہا کہ سیکرٹری مواصلات ذاتی طور پر منصوبوں کا دورہ کریں گے، منظوری معائنے کے بعد دی جائے گی،ٹول پلازوں پر توڑ پھوڑ برداشت نہیں کی جائے گی، ملوث افراد کے خلاف سخت قانونی کارروائی ہوگی ، ملوث افراد کے خلاف این ایچ اے فوری طورپر ایف آئی آر درج کرائی جائے۔عبدالعلیم خان نے کہا کہ معمول کے مرمتی منصوبیبدعنوانی کو فروغ دیتے ہیں، بد عنوانی کی اجازت نہیں دی جائے گی، ہر سطح پر افسران کو دیانت داری سے کام کو یقینی بنانا ہو گا۔اجلاس میں سیکرٹری مواصلات علی شیر محسود اور دیگر اعلیٰ حکام کی شرکت کی۔
