راولپنڈی (رپورٹنگ آن لائن) بانی پی ٹی آئی عمران خان کی بہن علیمہ خان کو اڈیالہ جیل کے باہر 2 لڑکیوں نے انڈا دے مارا۔
علیمہ خان پر میڈیا سے گفتگو کے دوران انڈا پھینکنےکا واقعہ پیش آیا جس کے بعد پولیس نے 2 لڑکیوں کو حراست میں لے لیا، پولیس نے دونوں لڑکیوں کو اڈیالہ چوکی منتقل کردیا۔عمران خان کی بہن علیمہ خان نے کہا کہ ہمیں فکر نہیں ہم پر کوئی حملہ کرے ہمیں پتہ ہے یہ ہوگا۔
اس کے بعد بانی پی ٹی آئی کی بہن علیمہ خان اڈیالا جیل کے باہر موجود صحافیوں کے سوالات کا جواب دینے کے بجائے گاڑی میں جا کر بیٹھ گئیں۔اس موقع پر موجود پی ٹی آئی رہنما اور کارکنوں کی صحافیوں سے تلخ کلامی بھی ہوئی اور علیمہ خان سے تلخ سوالات پوچھنے پر کارکن مشتعل ہوگئے۔
علیمہ خان نے اڈیالا جیل کے باہر کہا تھا کہ ہوا بدلی ہے، لوگوں کا غصہ اور ان کا خوف دیکھ لیں، لوگ ظلم قبول نہیں کریں گے، پولیس والے ہمیں کہہ رہے ہیں ہم تنگ پڑ گئے ہیں، لوگ 8 فروری کو کھڑے ہوئے تھے، آج بھی کھڑے ہیں۔
انہوں نے کہا کہ بانی پی ٹی آئی عوام کی آواز ہیں، وہ جمہوریت اور قانون کی حکمرانی کی بات کرتے ہیں، یہ بانی پی ٹی آئی کی آواز بند کرنا چاہتے ہیں۔
