لاہور (رپورٹنگ آن لائن ) پاکستان مسلم لیگ(ن)پنجاب کی ترجمان عظمی بخاری نے کہا ہے کہ بزدار صاحب پی ڈی ایم پر تنقید آپکا لیول نہیں ، آپ صرف ڈینگی پر توجہ دیں، ڈینگی سے لوگ مر رہے ہیں اور آپکو پی ڈی ایم کی فکر ستائے جارہی ہے ، عثمان بزدار نے وزیر اعلی ہوتے ہوئے بھی خود کو اور اپنی حکومت کو بند گلی میں بند کردیا ہے۔
عثمان بزدار کے بیان پر ردعمل دیتے ہوئے عظمی بخاری نے کہا کہ پنجاب حکومت ایسی بند گلی میں داخل ہوگئی ہے جس کا نہ کوئی دروازہ اور نہ کھڑکی ہے ، جس کا منہ بولتا ثبوت ضمنی اور کنٹونمنٹ بورڈز کے الیکشن ہیں۔ انہوں نے کہا کہ ہر الیکشن میں انکو منہ کی کھانی پڑتی ہے پھر بھی شیخ چلی والی بڑکیں مارنے سے باز نہیں آتے ، عثمان بزدار ایسا لطیفہ بن گئے ہیں جن پر اب سوشل میڈیا پر میمز اور کارٹون بھی بننے شروع ہو گئے ہیں ، کارٹون نیٹ ورک کے ہیرو اور ویلن اب خود کو حقیقی ہیرو سمجھنے لگ گئے ہیں۔
