اسلام آباد (رپورٹنگ آن لائن) پاکستان مسلم لیگ (ن) کی سیکرٹری اطلاعات مریم اور نگزیب نے کہا ہے کہ عدالتیں ریاستی دہشت گرد اور چوروں کی پناہ گاہ نہیں ہوتیں۔ اپنے بیان میں مریم اور نگزیب نے کہاکہ عمران خان نے پاکستان پر حملہ کیا، ریاستی مفادات کو نقصان پہنچایا، اسے تحفظ دینے سے ریاست کے مفادات کو نقصان پہنچے گا۔ انہوںنے کہاکہ جج ریاست کے مجرموں کو سزا دیتے ہیں، سہولت کاری نہیں کرتے ۔
مریم اور نگزیب نے کہاکہ قومی اداروں پر حملہ کرنے، شہدا اور قومی یادگاروں کی بے حرمتی کرنے والے ریاستی مجرم کی سہولت کاری پاکستان کے دشمنوں اور مجرموں کی سہولت کاری اور حوصلہ افزائی کے مترادف ہے، یاد رکھیں کہ جسے تحفظ دیا جا رہا ہے، اس نے ریاست پر حملہ کیا تھا. 9مئی کے مجرم کو تحفظ دینا ہے تو ”گڈ لک ٹو یو”ریٹائرمنٹ کے بعد عوام آپ کو ”گڈ ٹو سی یو”نہیں کہے گی ۔ انہوںنے کہاکہ تاریخ میں پہلی دفعہ سیشن عدالت، ہائی کورٹ اور سپریم کورٹ ایک ہی مقدمے کی سماعت میں مصروف ہے۔ 56 ہزار زیر التوا مقدمات کہاں سنیں جائیں گے۔
