لاہور (رپورٹنگ آن لائن) پاکستان مسلم لیگ (ن)پنجاب کی ترجمان عظمی بخاری نے کہا ہے کہ عثمان بزدار نے جنوبی پنجاب کی عوام کو انکے حق سے محروم کیا ہے۔
وزیر اعلی پنجاب عثمان بزدار کے بیان پر ردعمل دیتے ہوئےعظمی بخاری نے کہا کہ بزدار صاحب آپ نہ کام کے ہیں نہ کاج کے، بس دشمن اناج کے، آپ بس پنجاب کو پشاور بی آر ٹی کے کھڈوں میں تبدیل کرنے آئے ہیں، آج عام آدمی آپ کی نالائقیوں کی سزا بھگت رہا ہے۔ انہوں نے کہا کہ ہمیں معلوم ہے پی ڈی ایم آج آپ کے ضلع میں جلسہ کررہی ہے، اس لیے عثمان بزدار کو بیانات جاری کرنے کی بجائے اپنی خود احتسابی کرنی چاہیے، پی ڈی ایم آج ڈی جی خان میں تاریخی جلسہ کرے گی، پی ڈی ایم کا آج کا جلسہ ڈیرہ غازی کی تاریخ کا سب سے بڑا جلسہ ہوگا۔
عظمی بخاری نے کہا کہ عثمان بزدار نے جنوبی پنجاب کی عوام کو انکے حق سے محروم کیا ہے، یہ جنوبی پنجاب کی بجائے لاہور کو پیارے ہو گئے ہیں، تحریک انصاف نے جنوبی پنجاب کی عوام سے کیا ایک بھی وعدہ پورا نہیں کیا، جنوبی پنجاب کی عوام کو صوبے کا جھانسہ دے کر سیکرٹریٹ کا لالی پاپ دے دیا گیا ہے۔ انہوں نے مزید کہا کہ جنوبی پنجاب کو جنوبی سیکرٹریٹ نہیں انکا حق چاہیے، جنوبی پنجاب کو انکا حق صرف (ن) لیگ ہی دے سکتی ہے۔
