دوحہ (رپورٹنگ آن لائن)عالمی اسنوکر چیمپئن شپ میں دفاعی چیمپئن محمد آصف نے فاتحانہ آغاز کرتے ہوئے اپنا ابتدائی میچ جیت لیا تاہم عالمی انڈر 17 چیمپئن محمد حسنین اختر اپنا افتتاحی میچ ہار گئے۔
موصولہ اطلاعات کے مطابق قطر کے شہر دوحا میں شروع ہونے والی آئی بی ایس ایف عالمی اسنوکر چیمپئن شپ میں عالمی چیمپئن محمد آصف نے اپنے حریف سنگاپور کیچن کینگ کوانگ کو ایک آسان مقابلے کے بعد 0ـ4 سے شکست دے دی۔محمد آصف کی جیت کا فریم اسکور 9ـ89، 44ـ73، 48ـ58 اور 13ـ83 رہا تاہم دوسرے قومی کیوئسٹ اور عالمی انڈر 17 چیمپئن محمد حسنین ہانگ کانگ کے تام یون فنگ سے سخت مقابلے میں 4ـ3 فریم اسکور سے ہار گئے۔
فنگ کی جیت کا فریم اسکور 73ـ38، 42ـ77، 59ـ52، 26ـ70، 79ـ26، 47ـ80 اور 4ـ116 رہا۔ میچ کے دوران فاتح کھلاڑی نے ساتویں فریم میں سنچری بریک بھی کھیلا۔چیمپئن شپ کے پہلے مرحلے میں 48 کھلاڑیوں کو 12 گروپس میں تقسیم کیا گیا ہے۔لیگ راؤنڈ کے بعد ہر گروپ سے 2، 2 کھلاڑی ناک آوٹ راؤنڈ میں جگہ بنائیں گے۔
