اسلام آباد(رپورٹنگ آن لائن)نائب صدر پاکستان پیپلز پارٹی سینیٹر شیری رحمان نے کہا ہے کہ معیشت پر ناکام تجربے اب بند ہونے چائیں ، مالی سال کے پہلے 6ماہ کا تجارتی خسارہ 24.79بلین ڈالر تک پہنچ گیا ہے جبکہ ایکسپورٹس میں 14کروڑ 20لاکھ ڈالر کمی ریکارڈ کی گئی ہے،
منگل کوسماجی رابطے کی ویب سائٹ ٹوئٹر پر اپنے پیغام میں شیری رحمان نے لکھا کہ پی ٹی آئی حکومت نے ناکامی کا ایک اور ریکارڈ قائم کر دیا ہے، امپورٹس 63فیصد بڑھ کر 39.91بلین ڈالر تک پہنچ گئی ہیں اور آگے روپے کی قدر میں مزید کمی ہوگی،
صرف 6ماہ میں ملک کے تجارتی خسارے میں 100فیصد اضافہ قابل تشویش ہے،انہوں نے کہا کہ گندم اور چینی ایکسپورٹ کر کے امپورٹ کی گئی جبکہ اس پر احتساب کے ادارے بھی خاموش رہے، ایک طرف تجارتی خسارے میں اضافہ ہو رہا ہے تو دوسری طرف حکومت ایکسپورٹس بڑھنے کا دعوی کر رہی ہے،انہوں نے کہا کہ معیشت پر ناکام تجربے اب بند ہونے چائیں۔
