لاہور(رپورٹنگ آن لائن)پاکستان مسلم لیگ نون کی ترجمان مریم اورنگزیب نے کہا ہے کہ صرف پٹرول نہیں، بجلی، گیس، آٹا، چینی، دوائی، دودھ سب مزید مہنگا ہوگا، غریب دو وقت کی روٹی کا متحاج ہے، نااہل حکومت کو کوئی پرواہ نہیں، حکمرانوں سے جان چھڑانا ناگزیر ہوچکا،
انہوں نے حکومت کو شدید تنقید کا نشانہ بنایا جبکہ لاہور میں عدالت پیشی کے موقع پر نون لیگ پنجاب کے صدر رانا ثنا اللہ نے کہا کہ گزشتہ روز بجلی کی قیمت میں اضافہ کیا گیا ہے، ابھی پٹرول کی قیمتوں میں اضافہ کردیا گیا، ملکی تاریخ میں پہلی بار پیٹرول کی قیمت میں اتنا بڑا اضافہ کیا گیا ہے، پیٹرولیم مصنوعات کی قیمتوں میں اضافے سے متعلق وزارت نے جو تجویز دی اس سے دگنا اضافہ کردیا گیا، آئی ایم ایف کے کہنے پر ظلم کیا جارہا ہے، عمران خان کہتے تھے کہ میں آئی ایم ایف کے پاس نہیں جاﺅں گا، وزیراعظم خود کشی نہیں کرسکتے تو خودکشی کی کوشش ہی کرلیں، لوگوں کی قوت خرید روز بروز کم ہو رہی ہے،،
اب سفید پوش لوگوں کا زندگی گزارنا بھی ناممکن ہوگیا، عوام کو سڑکوں پر آکر ظلم کیخلاف صدائے احتجاج بلند کرنی چاہیے، عمران خان کی موجودگی تک ظلم ہوتا رہے گا،لیگی رہنما نے کہا کہ شہباز شریف نے میثاق معیشت کی پیشکش کی تھی، میثاق معیشت ضرور ہونا چاہیے، جب تک تمام سیاسی جماعتیں سر جوڑ کر نہ بیٹھیں مسائل حل نہیں ہوسکتے، قومی قیادت کو مل بیٹھ کر میثاق معیشت کرنا چاہیے،
متحدہ اپوزیشن اور پی ڈی ایم کو لانگ مارچ کی کال دینی چاہیے اور سیلکٹڈ ٹولے کو نکال باہر کرنا چاہیے، انہوں نے کہا کہ مریم نواز (ن) لیگ کی رکن ہونے ناطے پی ڈی ایم کا حصہ ہیں، پی ڈی ایم کے اتحاد میں پیپلزپارٹی نہیں ہے، اپوزیشن اتحاد میں 8جماعتیں ہیں قومی اسمبلی میں پیپلز پارٹی متحد اپوزیشن کے ساتھ ہے۔
