اسلام آباد(رپورٹنگ آن لائن)صدر مملکت آصف علی زرداری سے پاکستان میں مراکش کے سفیر محمد کارمون نے ایوان صدر میں ملاقات کی اور دونوں ممالک کے درمیان برادرانہ تعلقات کو مضبوط بنانے کی ضرورت پر زور دیا۔
منگل کوملاقات کے دوران صدر آصف علی زرداری نے پاکستان اور مراکش کے درمیان برادرانہ تعلقات کو مزید مضبوط بنانے پر زور دیا۔ صدر آصف علی زرداری نے کہا کہ پاکستان اور مراکش کے تعلقات مشترکہ عقیدے، اقدار اور باہمی احترام پر مبنی ہیں۔ صدر مملکت نے مراکش کے ساتھ مختلف شعبوں میں دوطرفہ تعاون بڑھانے کے عزم کا اظہار کیا۔
انہوں نے کہا کہ پاکستان مراکش کے ساتھ معاشی تعلقات کو انتہائی اہمیت دیتا ہے، دونوں ملکوں میں تعاون کے وسیع مواقع موجود ہیں۔ صدرِ مملکت نے 2022کے سیلاب میں پاکستان کی مدد پر مراکش کا شکریہ ادا کیا۔ صدر مملکت نے شاہ محمد ششم کی صحت کے لیے نیک خواہشات کا اظہار کیا۔
