کراچی(رپورٹنگ آن لائن)چیئرمین پیپلز پارٹی بلاول بھٹو زرداری نے کہا ہے کہ سندھ حکومت ہر شعبے میں بہتری کے لیے کام کر رہی ہے، صحت کے شعبے میں بہتری پر خصوصی توجہ مرکوز ہے۔
سندھ حکومت کی کارکردگی اور آئندہ کی حکمت عملی کے حوالے سے بلاول بھٹو زرداری نے بریفنگ دیتے ہوئے کہا کہ پورے سندھ میں صحت کے نظام کو مضبوط بنانے کے لیے اقدامات کیے۔انہوں نے کہا کہ سندھ میں عالمی معیار کی صحت کی سہولتیں مفت دی جا رہی ہیں، سندھ حکومت نے جناح اسپتال کو عالمی معیار کا بنایا این آئی سی وی ڈی میں دل کے امراض کا علاج مفت کیا جارہا ہے۔
بلاول بھٹو زرداری نے کہا کہ سندھ میں این آئی سی وی ڈی طرز کے 11 اسپتال قائم کیے، ایک سال میں این آئی سی وی ڈی سے 2 اعشاریہ 9 ملین مریض علاج کرا چکے ہیں۔انہوں نے کہا کہ سندھ میں کینسر کا مہنگا ترین علاج مفت کیا جا رہا ہے، پہلی بار کینسر کے علاج کے لیے سائبر نائف ٹیکنالوجی متعارف کروائی۔
