گوجرانوالہ (رپورٹنگ آن لائن)سابق وزیرِ اعظم نواز شریف کے داماد، مسلم لیگ ن کے رہنما کیپٹن (ر) صفدر نے کہا ہے کہ شہباز شریف کی دور اندیشی تھی جس نے فیڈریشن کو بچا لیا،نواز شریف الیکشن سے پہلے وطن واپس آئیں گے۔
یہ بات انہوں نے گوجرانوالہ کی عدالت میں پیشی کے بعد میڈیا سے گفتگو کے دوران کہی ۔کیپٹن (ر) محمد صفدر نے اپنے سسر کے حوالے سے کہاکہ نواز شریف الیکشن سے پہلے وطن واپس آئیں گے۔دوسری جانب جوڈیشل مجسٹریٹ گوجرانوالہ کی عدالت نے کیپٹن (ر) محمد صفدر اور سابق ایم پی اے عمران خالد بٹ کے خلاف کیس کی سماعت کرتے ہوئے فیصلہ محفوظ کر لیا۔
کیپٹن (ر) صفدر اور عمران خالد بٹ دورانِ سماعت عدالت میں پیش ہوئے۔وکیلِ صفائی اور سرکاری وکیل نے دلائل مکمل کر لیے جس کے بعد عدالت نے کیس کا فیصلہ محفوظ کر لیا اور سماعت 26 ستمبر تک ملتوی کر دی۔واضح رہے کہ دونوں رہنمائوں پر ریاستی اداروں کے خلاف تقاریر اور بغاوت کے الزامات کا مقدمہ درج ہے۔
