اسلام آ باد(رپورٹنگ آن لائن ) پاکستان پیپلزپارٹی کی رہنما سینیٹر پلوشہ خان نے کہا ہے کہ شوکاز کو آج وضاحت کا نام دے کر شاہد خاقان عباسی نے یوٹرن لے لیا ہے، رات شوکاز بنا کر جاری کیا، آج صبح تک وہ وضاحت میں بدل چکا ہے اور کل ن لیگ اس پر شرمندگی کا اظہار کرے گی،
نواز شریف نے سابق صدر زرداری سے ان کے خلاف کرپشن کے جھوٹے مقدمات بنوانے پر معافی مانگی، نواز شریف نے شہید بے نظیر بھٹو کی کردارکشی کرنے پر شرمندگی کا اظہار کیا۔ شوکاز نوٹس کے معاملے پر اہم بیان میں پلوشہ خان نے کہا مریم نواز اپنے غلط مشوروں سے شوکاز جاری کروا کر نواز شریف کو مستقبل میں ایک اور بار شرمندگی پر مجبور کرچکی ہیں،
شوکاز نوٹس سے صاف ظاہر ہوچکا ہے کہ ن لیگ نے جان بوجھ کر ایسا ماحول پیدا کیا کہ جس سے پی ڈی ایم میں اختلافات ہوں، ن لیگ نے استعفوں کو لانگ مارچ سے اچانک نتھی کرکے پی ڈی ایم میں پھوٹ ڈالی، پلوشہ خان نے کہا ن لیگ نے سینیٹرز کے آزاد پارلیمانی گروپ کو زبردستی باپ کا قرار دے دیا جو حقائق کے خلاف ہے، آزاد پارلیمانی گروپ کے سینیٹرز خود کہہ رہے ہیں کہ وہ باپ کے رکن نہیں مگر ن لیگ پی ڈی ایم میں پھوٹ ڈلوانے کے علاوہ کچھ سننے کو تیار نہیں،
آج پاکستان پیپلزپارٹی کے خلاف ن لیگ اور پی ٹی آئی ایک پیج پر آچکے ہیں، ہم مفاہمت چاہتے ہیں تاہم بزدل نہیں، بلاول بھٹو ن لیگ اور پی ٹی آئی سے نمٹنے کے لئے اکیلے کافی ہیں۔
