لاہور(رپورٹنگ آن لائن )تھیٹر کی نامور اداکارہ روبی انعم نے شوبز سے وابستہ خواتین سے اپیل کی ہے کہ وہ طلاق کو پروموٹ کرنے کے بجائے اس کی حوصلہ شکنی کریں اور سر عام کہیں کہ طلاق بری چیز اور برا عمل ہے۔
ایک پوڈ کاسٹ میں گفتگو کرتے ہوئے روبی انعم نے کہا کہ یہ تعجب کی بات ہے کہ خواتین طلاق کو پروموٹ کر رہی ہیں۔انہوں نے کسی کا نام لیے بغیر کہا کہ ایک بڑی ہی مشہور اداکارہ فخر سے کہتی ہیں کہ انہوں نے شادی کے 35 سال بعد طلاق لی، کیونکہ وہ مزید برداشت نہیں کر سکتی تھیں۔طلاق جیسی بری چیز کوئی نہیں، ہر کسی کو اس کی حوصلہ شکنی کرنی چاہیے، طلاق کو پروموٹ کرنے سے نوجوان بچیاں غلط اثر لے سکتی ہیں۔اداکارائوں کو یہ نہیں کہنا چاہیے کہ انہوں نے شادی میں بہت ظلم برداشت کیے، انہیں اچھی اور مثبت باتیں بھی بتانی چاہیے، بری باتیں بتا کر طلاق کو پروموٹ نہیں کیا جانا چاہیے۔
انہوں نے کہا کہ شوبز سے وابستہ خواتین سمیت دوسری خواتین کو یہ بھی نہیں کہنا چاہیے کہ تشدد برداشت نہیں کرسکتی تھی اس لیے طلاق لی اور یہ کہ شادی کے بعد تشدد برداشت کرنا پڑے گا۔انہوںنے کہا کہ وہ کسی بھی شوبز سے وابستہ خاتون کا نام نہیں لے رہیں، وہ عام رجحان پر بات کر رہی ہیں، شوبز کی خواتین طلاق کو پروموٹ کرتی ہیں۔شوبز کی خواتین کو یہ نہیں کہنا چاہیے کہ شادی نہیں کرنی چاہیے، وہ طلاق کے بعد بہت خوش ہیں، انہوں نے شادی میں بہت تکلیفیں دیکھی اور کاٹیں۔
