لاہور(رپورٹنگ آن لائن )اداکارہ قدسیہ علی نے کہا ہے کہ ہمارے معاشرے میں شوبز سے وابستہ لڑکیوں کے حوالے سے تنگ نظری عروج پر ہے اور لوگ اس شعبے کی لڑکیوں کو خوش دلی سے قبول نہیں کرتے ،پاکستانی مرد اداکارائوں کی تعریف کرتے ہیں لیکن اپناتے نہیں۔
ایک انٹر ویو میں انہوں نے بتایا کہ ان کے ساتھ حال ہی میں ایک حادثہ ہوا، ان کے ایک شخص کے ساتھ تعلقات تھے لیکن پھر وہ تعلقات نہ رہے،اداکارہ نے بتایا کہ بعد میں انہیں پتا چلا کہ ان کی اور مذکورہ شخص کی شادی نہیں ہو سکتی کیونکہ وہ اداکارہ تھیں۔انہیں شادی کرنے کے لیے اداکاری چھوڑنی پڑتی اس لیے انہوں نے تعلقات ختم کیے اور یہ کہ اب بھی ایسا سمجھا جاتا ہے اور مرد اداکارہ سے شادی کرنے سے کتراتے ہیں۔
ہمارے ہاں لوگ لڑکیوں کوسکرین پر تو دیکھنا چاہتے ہیں لیکن ان کے لئے سوچ کا معیار الگ رکھا ہوا ہے ۔شوبز سے وابستہ لڑکیوں کے مقابلے میں مرد اداکاروں کو اچھے سے اچھے اور بڑے گھروں کے رشتے بھی آسانی سے مل جاتے ہیں جو ہمارے معاشرے کا دوغلا معیار ہے ۔انہوںنے کہا کہ خود مختار اور آزاد خواتین کو ایک قیمت چکانا پڑتی ہے حالانکہ اب 2025 ہوچکا ہے لیکن حالات میں ابھی تک کوئی تبدیلی نہیں آئی۔قدسیہ علی نے کہا کہ خود مختار اور آزاد خاتون کے حوالے سے سوچا جاتا ہے کہ وہ کسی کے قابو میں نہیں آئے گی، وہ کسی کے آگے نہیں جھکے گی، اس لیے ان سے فاصلہ اختیار کیا جاتا ہے۔
