اسلام آ باد (رپورٹنگ آن لائن) ترجمان دفتر خارجہ عاصم افتخار احمد نے بتایا ہے کہ سارک کے سیکرٹری جنرل ایسالا رووان ویراکون کل 22سے 25 دسمبر تک پاکستان کا دورہ کریں گے۔
انہوں نے اپنے جاری کردہ بیان میں کہا ہے کہ مارچ 2020 میں اپنا عہدہ سنبھالنے کے بعد سارک سیکرٹری جنرل کا پاکستان کا یہ پہلا دورہ ہے۔ عاصم افتخار احمد نے کہا کہ سارک کے سیکرٹری جنرل وزیراعظم عمران خان اور وزیر خارجہ سے ملاقات کے علاوہ دیگر اعلی حکام سے بھی ملاقاتیں کریں گے۔
ترجمان دفتر خارجہ کا کہنا ہے کہ سارک کے بانی رکن کے طور پر پاکستان تنظیم کے مقاصد کو آگے بڑھانے کے لیے پوری طرح پرعزم ہے، پاکستان نے ہمیشہ سارک کے عمل اور سرگرمیوں میں فعال کردار ادا کیا ہے۔ انہوں نے مزید کہا کہ پاکستان نے خطے میں تعاون، باہمی اعتماد، سماجی اور ثقافتی ترقی کے سارک مقاصد کے حصول میں اہم کردار ادا کیا ہے۔
