اسلام آباد (رپورٹنگ آن لائن)نائب صدر پیپلزپارٹی سینیٹر شیری رحمان نے اسرائیل کے غزہ پر فوجی قبضے کے منصوبے کی شدید الفاظ میں مذمت کرتے ہوئے کہا ہے کہ سلامتی کے پردے میں چھپ کر اسرائیل غزہ پر قبضے کو قانونی حیثیت دینے کی ناکام کوشش کر رہا ہے، یہ ظلم کو نظام کا حصہ بنانے کی سازش ہے۔
اپنے بیان میں شیری رحمن نے کہاکہ غزہ کو بھوک، پیاس اور قحط سے مارنا جنگ نہیں بلکہ منظم نسل کشی کی بدترین اور سنگ دل مثال ہے۔ انہوںنے کہاکہ اسرائیل بھوک کو جنگی ہتھیار کے طور پر استعمال کر رہا ہے تاکہ ایک پوری نسل کو گھٹنے ٹیکنے پر مجبور کیا جا سکے۔شیری رحمن نے کہاکہ غزہ کے ہسپتال بند، بچے نڈھال، ماں باپ بے بس کیا یہی بین الاقوامی نظام انصاف ہے؟ ،61ہزار معصوم جانوں کے قاتل کو کٹہرے میں لایا جائے.
اسرائیلی قیادت کو عالمی عدالت میں جوابدہ بنایا جائے۔ انہوںنے کہاکہ دو ملین سے زائد زندگیاں اسرائیلی محاصرے کی لپیٹ میں سسک رہی ہیں، یہ صرف ایک انسانی بحران نہیں بلکہ انسانیت کا امتحان ہے، غزہ میں خوراک اور پانی پر پابندی لگا کر اسرائیل دنیا کو بتا رہا ہے کہ ظلم اب پالیسی بن چکا ہے۔ شیری رحمن نے کہاکہ دنیا کی مجرمانہ خاموشی ظالم کو ظالم اسرائیل کومزید بے خوف بنا رہی ہے،مظلوم فلسطینیوں کو انصاف دیا جائے۔
