سلام آباد(رپورٹنگ آن لائن)سپیکر قومی اسمبلی اسد قیصر نے انتخابی اصلاحات سمیت دیگر بلوں کی منظوری کیلئے اپوزیشن لیڈر شہباز شریف سے کردار ادا کرنے کا مطالبہ کردیا اور کہا ہے کہ بلوں پر غور کرنے اور ترامیم تجویز کرنے کیلئے حکومت اور اپوزیشن کے اتفاق رائے سے قانون سازی سے متعلق متفقہ کمیٹی تشکیل دی گئی تھی،کمیٹی کی طرف سے مشاورتی عمل مکمل نہیں ہو سکا،امید ہے اپوزیشن لیڈر اس عمل کو بامقصد بنانے کیلئے اپنا کردار ادا کریں گے_
جمعہ کو سپیکر قومی اسمبلی اسد قیصر نے اپوزیشن لیڈر شہباز شریف کو خط لکھا،خط میں سپیکر قومی اسمبلی نے کہا کہ اپوزیشن اور حکومت کو وسیع تر قومی مفاد کو مدنطر رکھتے ہوئے مشترکہ مفادات کی تمام اہم اصلاحات پر پارٹی سیاست سے بالاتر ہو کر جامع فیصلہ سازی اور اتفاق رائے پیدا کرنے کیلئے آگے بڑھنا چاہئے،وسیع تر عوامی مفاد میں الیکشنز (ترمیمی) بل 2021 سمیت مختلف بلز پر دوبارہ مشاورتی عمل شروع کرنے اور قانون سازی کیلئے تشکیل دی گئی متفقہ کمیٹی کے فورم کو بروئے کار لایا جائے،سپیکر قومی اسمبلی نے مزید کہا کہ اپوزیشن لیڈر کو اس ضمن میں اپنا کردار ادا کرنا چاہئے۔
مختلف بلز بشمول الیکشنز (ترمیمی) بل 2021 قومی اسمبلی سے پاس ہو چکے ہیں لیکن مقررہ وقت میں سینیٹ سے منظور نہ ہوسکے،مذکورہ بل مجلس شوری (پارلیمنٹ) کے مشترکہ اجلاس میں زیر غور آنے ہیں۔ سپیکر قومی اسمبلی نے خط میں کہا کہ ان بلوں پر غور کرنے اور ترامیم تجویز کرنے کیلئے حکومت اور اپوزیشن کے اتفاق رائے سے قانون سازی سے متعلق متفقہ کمیٹی تشکیل دی گئی تھی،کمیٹی کی طرف سے مشاورتی عمل مکمل نہیں ہو سکا۔ سپیکر قومی اسمبلی نے کہا کہ مید ہے اپوزیشن لیڈر اس عمل کو بامقصد بنانے کے لئے اپنا کردار ادا کریں گے،سپیکر آفس مذکورہ بلوں پر اتفاق رائے پیدا کرنے میں حکومت اور اپوزیشن کو سہولت فراہم کرے گا۔
