اسلام آباد(رپورٹنگ آن لائن)سپیکر قومی اسمبلی سردار ایاز صادق نے بنوں کینٹ پر دہشتگردوں کے حملے کی شدید مذمت کرتے ہوئے قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔
بدھ کوجاری بیان میں سپیکر قومی اسمبلی نے حملے میں زخمی ہونے والے افراد کی جلد صحتیابی کیلئے دعا کی اور شہداء کے اہل خانہ سے دلی تعزیت کا اظہار کرتے ہوئے کہا کہ وہ ان کے غم میں برابر کے شریک ہیں۔
انہوں نے کہاکہ ملک دشمن شرپسند عناصر کبھی بھی اپنی مذموم سازشوں میں کامیاب نہیں ہوں گے جبکہ سیکیورٹی فورسز اور قانون نافذ کرنے والے ادارے پوری قوت کے ساتھ ملک دشمن عناصر کے خلاف برسر پیکار ہیں۔
سپیکر قومی اسمبلی نے بنوں کینٹ پر حملے کو ناکام بنانے پر سیکیورٹی فورسز کو خراج تحسین پیش کرتے ہوئے کہا کہ یہ عناصر ملک و قوم کے دشمن ہیں اور ان کے ناپاک عزائم کو ہر صورت ناکام بنایا جائے گا۔انہوں نے شہداء کے درجات کی بلندی اور لواحقین کیلئے صبر جمیل کی دعا بھی کی۔
