لاہور (رپورٹنگ آن لائن) سوئی ناردرن گیس کے بلوں میں سابقہ بقایا جات شامل کرنے کا اقدام لاہور ہائیکورٹ میں چیلنج کردیا گیا ،عدالت نے دائر درخواستوں پر اہم فیصلہ دیتے ہوئے بقایا جات کی وصولی تاحکم ثانی روک دی ۔ جسٹس خالداسحاق نے اعجاز ٹیکسٹائل سمیت دیگر درخواستوں پر سماعت کی۔
سماعت کے دوران عدالت نے غیر قانونی نوٹیفیکیشنز کے اجراء پر برہمی کا اظہار کرتے ہوئے ریمارکس دیئے کہ درخواست گزاروں کو نوٹیفیکیشنز کے اجراء سے قبل سماعت کا کوئی موقع نہیں دیا گیا، جو بنیادی حقوق اور قانون کے مناسب عمل کی خلاف ورزی ہے۔ہائیکورٹ نے درخواست گزاروں کو عبوری ریلیف دیتے ہوئے حکم دیا کہ وہ سابقہ بقایا جات کے بغیر بل مقررہ تاریخوں پرادا کریں جبکہ روکی گئی رقوم کے مساوی پوسٹ ڈیٹڈ چیک بھی جمع کرائیں۔
عدالت نے مزید ہدایت کی کہ بلوں کی ادائیگی کی تاریخ 15 ستمبر تک بڑھائی جاتی ہے اورسوئی ناردرن گیس کمپنی درخواستگزاروں کو نظرثانی شدہ بل جاری کرے۔ عدالت نے واضح کیا کہ اگرعبوری ریلیف اگلی سماعت پرنہ بڑھایا گیا تو یہ خودبخود ختم ہو جائے گا۔عدالت نے وفاقی حکومت، اوگرا اور سوئی ناردرن گیس سمیت دیگر فریقین کو نوٹس جاری کرتے ہوئے 19 ستمبر تک جواب طلب کر لیا ۔
