کراچی(رپورٹنگ آن لائن) محکمہ سکول ایجوکیشن سندھ نے اساتذہ کے تبادلوں کا نوٹیفکیشن جاری کر دیا۔
ترجمان محکمہ تعلیم سندھ کے مطابق اساتذہ طلباء تناسب، سکول کی ضرورت اور ویڈ لاک پالیسی کے تحت مجموعی طور پر 10 ہزار 490 اساتذہ کے تبادلے کیے گئے ہیں۔ ترجمان نے بتایا کہ ایس ٹی آر کے تحت تبادلوں کے باعث 1320 بند سکول دوبارہ کھل جائیں گے، یہ سکول اساتذہ کے ریٹائرمنٹ یا انتقال کے سبب بند ہو گئے تھے۔
نوٹیفکیشن کے مطابق ان تبادلوں سے 1550 سکولوں میں اساتذہ کی کمی پوری ہو جائے گی جبکہ ایک استاد پر مشتمل 1328 سکولوں میں تدریسی عملے کی تعداد بڑھا دی گئی ہے۔ترجمان محکمہ تعلیم کے مطابق ویڈ لاک بنیادوں پر 1671 اساتذہ کے تبادلے ہوئے جن میں 1198 خواتین اور 473 مرد اساتذہ کے مسائل حل کیے گئے ہیں۔
