کراچی (رپورٹنگ آن لائن)سندھ ہائی کورٹ نے عدالتی جرمانہ معاف کرنے سے متعلق درخواست مسترد کردی ۔سندھ ہائیکورٹ میں عدالتی جرمانہ معاف کرنے سے متعلق درخواست کی سماعت ہوئی۔
عدالت نے درخواستگزار پر اظہار برہمی کیا۔ عدالت نے درخواست مسترد کردی۔ عدالت نے جرمانے کی رقم 2 لاکھ روپے فوری جمع کرانے کی ہدایت کردی۔ درخواستگزار کے وکیل نے موقف دیا کہ میں نے غیر قانونی تعمیرات کے خلاف درخواست دائر کی تھی۔ عدالت نے درخواست مسترد کرتے ہوئے 2 لاکھ روپے جرمانہ عائد کیا تھا۔ عدالت سے استدعا ہے کہ جرمانے کی رقم معاف کی جائے۔
عدالت نے ریمارکس دیئے کہ آپ جرمانہ ادا کریں، ورنہ جرمانے کی رقم دوگنا کردیں گے۔ جسٹس محمد اقبال کلہوڑو نے ریمارکس دیئے کہ آپ کو صبح صبح کوئی اور نہیں ملا سندھ ہائیکورٹ چلے آئے۔ آپ لوگوں کو بلیک میل کرتے ہیں، عدالت کا وقت ضائع کیا گیا ہے۔ درخواستگزار نے کہا کہ میں قسم کھا رہا ہوں، میرے گھر کے سامنے غیر قانونی تعمیرات ہو رہی ہے۔ عدالت نے ریمارکس دیئے کہ قسم نہ اٹھائیں، ہم نے بہت لوگ دیکھے ہیں جھوٹی قسم اٹھاتے ہوئے۔
