کراچی(رپورٹنگ آن لائن)سندھ ہائی کورٹ نے ایف آئی اے کی جانب سے بار بار ہراساں کرنے کیخلاف پراپرٹی ڈیلر کی درخواست پر ایف آئی اے کو درخواست گزار کوہراساں کرنے سے روک دیا ۔
ہائیکورٹ میں ایف آئی اے کی جانب سے بار بار ہراساں کرنے کیخلاف درخواست کی سماعت ہوئی۔ درخواستگزار کے وکیل نے موقف دیا کہ محمد سلیم پراپرٹی کے کام سے منسلک ہیں، ایف آئی اے بار بار طلب کر رہی ہے۔ کیس بھائی کیخلاف ہے لیکن میرے موکل کو ہراساں کیا جارہا ہے۔ کمرشل بینکنگ سرکل اس بات کی تفتیش نہیں کررہا کہ ڈارمنٹ اکاؤنٹ میں رقم کیسے آئی۔
کال آپ نوٹس کالعدم قرار دیئے جائیں۔ عدالت نے ریمارکس دیئے کہ ہم انکوائری میں رکاوٹ نہیں ڈالنا چاہتے۔درخواستگزار کے وکیل نے موقف دیا کہ ایف آئی اے کو ہدایت کی جائے کہ انکوائری کے دوران درخواستگزار کو ہراساں نا کیا جائے۔ بزنس مین کو بار بار کال اپ نوٹسز جاری کرنے پر عدالت ایف آئی اے پر برہم ہوگئی۔
جسٹس ظفر احمد راجپوت نے ریمارکس دیئے کہ ایک بار بلانے پر ہی تمام معلومات کیوں حاصل نہیں کی گئیں۔ اگر مزید معلومات درکار ہیں تو کال آپ نوٹس میں اسکی وضاحت کی جائے۔ وجوہات ظاہر کیئے بغیر دوبارہ طلب کرنا بدنیتی اور مذموم مقاصد کیلیے ہوتا ہے۔ عدالت نے درخواستگزار کو ہراساں نا کرنے کی ہدایت کرتے ہوئے سماعت ملتوی کردی۔
