کراچی(رپورٹنگ آن لائن)سندھ ہائیکورٹ نے قائدِ عوام انجینئرنگ یونیورسٹی میں کروڑوں روپے کی خورد برد کے مقدمے میں ملزم کی درخواست پرحفاظتی ضمانت منظورکرتے ہوئے ملزم کو 7 روز میں متعلقہ عدالت میں پیش ہونے کی ہدایت کردی ۔
منگل کوسندھ ہائیکورٹ میں قائدِ عوام انجینئرنگ یونیورسٹی میں کروڑوں روپے کی خورد برد کے مقدمے میں ملزم مسرور علی شاہ کی درخواست کی سماعت ہوئی۔ عدالت نے ملزم مسرور علی شاہ کی حفاظتی ضمانت منظور کرلی۔ عدالت نے ملزم کو 7 روز میں متعلقہ عدالت میں پیش ہونے کی ہدایت کردی۔
سرکاری وکیل کے مطابق ملزم مسرور علی شاہ پر الزام ہے کہ اس نے کنٹریکٹر کی حیثیت سے ہائر ایجوکیشن کمیشن کی جانب سے ملنے والی رقم میں خورد برد کی۔ ایف آئی اے نے مسرور علی شاہ، سیکرٹری یونیورسٹی قمر شیخ سمیت 8 افراد کیخلاف مقدمہ درج کیا ہے۔
