کراچی (رپورٹنگ آن لائن) اپوزیشن لیڈر سندھ اسمبلی حلیم عادل شیخ نے کہا ہے کہ سندھ کی عوام کو صحت کارڈ دینے کے لیے سندھ حکومت تیار نہیں ہے، سندھ حکومت سندھ کی عوام کے لیے سہولیات میں سب سے بڑی رکاوٹ ہے ، وڈیرانہ سوچ رکھنے والی جماعت کبھی بھی عوام کی ترقی نہیں چاہے گی۔
انہوں نے کہا کہ سندھ کی عوام کو صحت کارڈ دینے کے لیے سندھ حکومت تیار نہیں ، پنجاب، کے پی کے کے بعد جی بی، آزاد کشمیر اور بلوچستان کو مکمل صحت کارڈ کی سہولت ملنے جارہی ہے۔ اپوزیشن لیڈر سندھ اسمبلی نے کہا کہ سندھ حکومت نے راشن سبسڈی پروگرام میں بھی اپنا حصہ ڈالنے سے انکار کیا ، جس سے سندھ کی عوام کو مزید نقصان اٹھانا پڑ رہا ہے۔
حلیم عادل شیخ نے کہا کہ سندھ کی ترقی کے لیے ہر اقدام میں پی پی مخالفت کرتی ہے ، سندھ کارڈ کھیلنے والے حکمران صرف سندھ کو لوٹ کر جائیدادیں بنانا جانتے ہیں ، صوبے کے وزیراعلی کا کردار صرف نفرتیں بانٹنے تک محدود ہے۔ انہوں نے کہا کہ وزیر اعلی کی کابینہ میں بوتل کا ڈھکن کھولنے کے لیے تو وزیر موجود ہے لیکن عوام کے مسائل سننے کے لیے کوئی وزیر موجود نہیں ،
سندھ کی عوام کو اقلیت کہنے والے وزیراعلی سندھ فیڈریشن کے خلاف سازش کررہے ہیں۔ اپوزیشن لیڈر سندھ اسمبلی حلیم عادل شیخ نے کہا ہے کہ سندھ کی عوام کے لیے وفاق اپنا بھرپور کردار ادا کرتا رہے گا۔
