کراچی (رپورٹنگ آن لائن ) سندھ اسمبلی میں اپوزیشن لیڈرحلیم عادل شیخ نے کہا ہے کہ عدالت سے مرادعلی شاہ کو نااہل قراردینے کی استدعا اس لئے کی کیوں کہ سندھ اسمبلی سے ناامید ہوچکے ہیں،اسمبلی میں صرف اپنے فائدے کے قوانین بنائے جاتے ہیں، نا اہل اورکرپٹ وزیراعلی کےخلاف پٹیشن فائل کی ہے،زرعی پانی کی چوری کے خلاف آئینی درخواست دینے جارہے ہیں۔
سماعت کے بعدعدالت کے باہر صحافیوں سے بات کرتے ہوئے حلیم عادل شیخ نے کہا کہ وزیراعلی سندھ کےخلاف نوری آباد پاور پلانٹ کا ریفرنس ہے،43 لاکھ ایکڑاراضی کی جعلی الاٹمنٹ کی جوڈیشل انکوائری ہونی چاہیئے،10 لاکھ ایکڑ زمین کی جعلی الاٹمنٹ کرکے ریکارڈ جلادیا گیا۔ اپوزیشن لیڈر نے مزید کہا کہ پیپلزپارٹی کے چئیرمین بلاول کے زیر استعمال جہازسندھ حکومت کا ہے اور وہ کس قانون کے تحت وزیراعلی سندھ کا جہاز استعمال کررہے ہیں۔
