مکۃ المکرمہ (رپورٹنگ آن لائن) سعودی عرب کی وزارت صحت نے حاجیوں کو طبی سہولیات کی فراہم اور گرمی سے بچانے سمیت دیگر انتظامات مکمل کرلیے ہیں۔ سعودی ذرائع ابلاغ کے مطابق وزارت صحت نے حج مقامات پر حجاج کرام کو طبی سہولتیں فراہم کرنے کے لیے بیشتر انتظامات مکمل کر لیے ہیں۔
وزارت صحت کا کہنا ہے کہ حاجیوں کو صحت کی سہولیات فراہم کرنے کے لیے ڈاکٹرز، نرسوں اور معاون طبی عملے کا تقرر بھی کردیا گیا ہے۔ وزارت صحت کا کہنا ہے کہ اس سال حج سخت گرمی میں ہو رہا ہے، دھوپ کی شدت اور چلنے پھرنے کے باعث گرمی سے متاثرین کے لیے خصوصی صحت سہولیات کا بندوبست کیا گیا ہے اس کے علاوہ سخت درجہ حرارت سے تعلق رکھنے والے امراض سے نمٹنے کے انتظامات بھی کیے گئے ہیں۔
انھوں نے بتایا کہ منیٰ، عرفات اور مزدلفہ میں لْو سے متاثرہ حاجیوں کے علاج کے لیے صحت اداروں میں ضروری انتظامات کرلیے گئے ہیں، پانی کی پھوار والے پنکھے بھی نصب کیے گئے ہیں جن کی بدولت درجہ حرارت کی شدت کم ہو جاتی ہے اور دھوپ سے متاثرین کی تعداد اور شدید گرمی سے بے ہوش ہونے کے واقعات کم ہو جاتے ہیں۔
دریں اثنا وزارت حج و عمرہ نے کہا ہے کہ اس سال حاجیوں کی خدمت پر مامور تمام اہلکاروں کا کورونا ٹیسٹ ہوگا، جس ادارے کے بھی اہلکار حج خدمات کے لیے تعینات ہوں گے ان سب کا کورونا ٹیسٹ لیا جائے گا۔ سیکرٹری حج ڈاکٹر حسین الشریف کا کہنا ہے کہ امن عامہ کے سپاہی ہوں یا حج دفاتر کا انتظامی عملہ یا براہ راست حجاج کی خدمت کرنے والے لوگ ہوں ان سب کا کورونا ٹیسٹ ہوگا، ہر ایک کے بارے میں یہ اطمینان حاصل کیا جائے گا کہ وہ کورونا سے پوری طرح سے پاک ہے یا نہیں۔
ڈاکٹر الشریف نے یہ بھی بتایا کہ حاجیوں کو گروپوں کی شکل میں حج مقامات پر روانہ کیا جائے گا، ان کے ہمراہ صحت عملہ قافلے کا کمانڈر اور معاون بھی ہوگا، چار ذی الحج سے ان سب کو بھی قرنطینہ کیا جائے گا۔
