اسلام آباد (رپورٹنگ آن لائن)سپیکر قومی اسمبلی سردار ایاز صادق نے سر ڈھاکہ بلوچستان میں بے گناہ مسافروں پر فتنة الہندوستان کے دہشتگردوں کے حملے کی شدید مذمت کی ہے۔
جمعہ کو قومی اسمبلی سیکرٹریٹ کی جانب سے بیان کے مطابق سپیکرقومی اسمبلی نے دہشتگردی کا نشانہ بننے والے افراد کے لواحقین سے دلی ہمدردی اور تعزیت کا اظہارکرتے ہوئے کہا کہ وہ شہدا کے اہلخانہ کے دکھ میں برابر کے شریک ہیں۔انہوں نے کہا کہ معصوم شہریوں پر حملہ انسانیت سوز بربریت کی بدترین مثال ہے، دہشتگرد عناصر قومی وحدت اور امن کو نقصان پہنچانا چاہتے ہیں۔
سردار ایاز صادق نے کہا کہ قوم بھارتی سرپرستی میں ہونے والی ہر سازش کو ناکام بنانے کیلئے متحد ہے، دہشتگردوں اور ان کے سہولت کاروں کو قانون کے کٹہرے میں لایا جائے گا۔ سپیکر قومی اسمبلی نے شہدا ء کے خاندانوں کے ساتھ اظہار یکجہتی کرتے ہوئے کہا کہ پارلیمان دہشتگردی کے خلاف افواج اور سکیورٹی اداروں کے ساتھ کھڑی ہے، سکیورٹی فورسز بھارتی حمایت یافتہ دہشتگردوں کے خاتمے میں ضرور کامیاب ہوں گے۔ انہوں نے شہدا کے درجات کی بلندی اور سوگوار خاندانوں کیلئے صبر جمیل کی دعا کی۔
