کوالا لمپور(رپورٹنگ آن لائن)وزیراعظم محمد شہباز شریف نے کہا ہے کہ پاکستان اور ملائیشیاکے درمیان اقتصادی اور تجارتی شعبوں میں تعاون بڑھانے کی بہت گنجائش ہے،حکومت پاکستان سرمایہ کاری میں سہولت کے لئے اصلاحات پر توجہ مرکوز کئے ہوئے ہے،آئی ٹی،ٹیک اور اے آئی کے شعبوں میں وسیع استعداد کو مد نظر رکھتے ہوئے متعلقہ بین الاقوامی بزنس گروپس اور سرمایہ کاروں کا خیر مقدم کریں گے۔
منگل کو وزیراعظم آفس کے میڈیا ونگ سے جاری بیان کے مطابق انہوں نے ان خیالات کا اظہار ملائیشیا کے بزنس گروپ گوبی پارٹنرز کے وفد سے گفتگو کرتے ہوئے کیا جس نےگوبی پارٹنرز کے کو-فاؤنڈر اور چیئر تھامس ساؤ کی سربراہی میں ان سے ملاقات کی۔ملاقات میں نائب وزیراعظم و وزیر خارجہ اسحاق ڈار ، وفاقی وزیر تجارت جام کمال خان ،وفاقی وزیر برائے قومی غذائی تحفظ و تحقیق رانا تنویر حسین، وفاقی وزیر اطلاعات و نشریات عطاء اللہ تارڑ، وزیراعظم کے معاون خصوصی طارق فاطمی اور متعلقہ اعلیٰ سرکاری افسران بھی موجود تھے۔
وزیر اعظم نے کہا کہ پاکستان اور ملائیشیاکے درمیان اقتصادی اور تجارتی شعبوں میں تعاون بڑھانے کی بہت استعداد موجود ہے جس کے لئے دونوں فریقین بھرپور کام کر رہے ہیں،دونوں ممالک کی درمیان بزنس ٹو بزنس روابط بڑھانے کے حوالے سے گزشتہ روز پاکستان ملائیشیابزنس اینڈ انویسٹمنٹ کانفرنس کا انعقاد انتہائی خوش آئند ہے۔وزیراعظم نے کہا کہ ہم کاروبار کے لیے دوستانہ ماحول بنانے اور کاروبار کرنے میں آسانی کو بہتر بنانے کے لیے پرعزم ہیں،خصوصی سرمایہ کاری سہولت کونسل بیرونی سرمایہ کاروں کو ہر قسم کی سہولیات کی فراہمی کے لئے کوشاں ہے ۔
وزیراعظم نے کہا کہ پاکستان کے سٹارٹ اپ ایکو سسٹم پر گوبی پارٹنرز کا اعتماد خوش آئند ہے،حکومت پاکستان سرمایہ کاری سہولت اور بنیادی ڈھانچے تک بہتر رسائی کے ذریعے سٹارٹ اپس اور ابتدائی مرحلے کے سرمایہ کاروں کی مدد کے لیے مرکوز اصلاحات پر کام کر رہی ہے۔ وزیراعظم نے کہا کہ ایک پائیدار سٹارٹ اپ ماحولیاتی نظام کی تعمیر کے لیے بین الاقوامی اور ملکی سرمایہ کو راغب کرنا ہماری ترجیح ہے،ڈیجیٹل معیشت خاص طور پر فن ٹیک، ای کامرس اور آئی ٹی خدمات ہماری قومی ترقی کی حکمت عملی میں مرکزی حیثیت رکھتی ہے۔
وزیراعظم نے کہا کہ ہم پاکستان کے آئی ٹی، ٹیک، اور اے آئی کے شعبوں میں وسیع استعداد کو مد نظر رکھتے ہوئے متعلقہ بین الاقوامی بزنس گروپس اور سرمایہ کاروں کا خیر مقدم کریں گے۔ملاقات کے دوران گوبی پارٹنرز کے وفد نے پاکستان میں ای-کامرس اور فنانشل ٹیکنالوجیز کے شعبے میں اشتراک میں گہری دلچسپی کا اظہار کیا۔
