اسلام آباد (رپورٹنگ آن لائن)اسپیکر قومی اسمبلی سردار ایاز صادق نے پاکستان بارڈر پر افغانستان کی بلا اشتعال جارحیت کی شدید مذمت کرتے ہوئے کہا ہے کہ شہری آبادی پر افغان فورسز کی فائرنگ عالمی قوانین اور انسانی حقوق کی کھلی خلاف ورزی ہے۔
اسپیکر سردار ایاز صادق نے پاک افواج کو افغان جارحیت کا منہ توڑ جواب دینے پر زبردست خراجِ تحسین پیش کیا ۔ انہوںنے کہاکہ شہری آبادی پر افغان فورسز کی فائرنگ عالمی قوانین اور انسانی حقوق کی کھلی خلاف ورزی ہے، افغانستان کی اشتعال انگیزی خطے کے امن و استحکام کے لیے خطرہ ہے۔ سر دار ایاز صادق نے کہاکہ پوری قوم پاک افواج کے ساتھ سیسہ پلائی دیوار کی مانند کھڑی ہے، کسی کو بھی پاکستان کی سالمیت اور خودمختاری پر حملے کی اجازت نہیں دی جائے گی۔
انہوںنے کہاکہ مادرِ وطن کے دفاع کے لیے پاک افواج ہر لمحہ تیار ہے۔ انہوںنے کہاکہ پاکستان نے ہمیشہ ایک پرامن، مستحکم اور خوشحال افغانستان کی حمایت کی ہے، پاکستان گزشتہ چار دہائیوں سے زائد عرصے سے چالیس لاکھ سے زیادہ افغان مہاجرین کی میزبانی کر رہا ہے۔ سر دار ایاز صادق نے کہاکہ پاکستان ایک پر امن ملک ہے اور کسی کے خلاف جارحانہ عزائم نہیں رکھتا، پاکستان کے صبر کو کمزوری نہ سمجھا جائے، سرحدی خلاف ورزیاں ناقابلِ برداشت ہیں۔
انہوںنے کہاکہ علاقائی امن و ترقی کے لیے باہمی احترام اور سفارتی تعاون ضروری ہے، فیلڈ مارشل سید عاصم منیر کی قیادت میں پاک فوج کسی بھی جارحیت کا منہ توڑ جواب دینے کی بھرپور صلاحیت رکھتی ہے۔ انہوںنے کہاکہ افغانستان کی سر زمین پاکستان کے خلاف دہشتگردی میں استعمال ہو رہی ہے، پاکستان کی مسلح افواج کی موجودگی میں کوئی بھی دشمن پاکستان کی طرف میلی آنکھ سے دیکھنے کی جرات نہیں کر سکتا۔
