اسلام آباد (رپورٹنگ آن لائن)سپیکر قومی اسمبلی سردار ایاز صادق نے فیڈرل کانسٹیبلری ہیڈ کوارٹر پشاور پر فتنہ الخوارج کے حملے کی مذمت کرتے ہوئے تینوں حملہ آوروں کو جہنم واصل کرنے اور حملے کو ناکام بنانے پر سکیورٹی فورسز کو خراجِ تحسین پیش کیا ہے۔ قومی اسمبلی سیکرٹریٹ سے پیر کو جاری بیان کے مطابق انہوں نے حملے میں شہید ہونے والے تین ایف سی شہدا کو خراجِ عقیدت پیش اور ان کے اہلِ خانہ سے دلی ہمدردی و تعزیت کا اظہار کیا۔
انہوں نے کہا کہ دہشتگرد بزدلانہ کارروائیوں سے قوم کے حوصلے پست نہیں کر سکتے،دہشتگردی کے خاتمے کے لیے قومی اتحاد اور یکجہتی ناگزیر ہے،دہشتگرد اپنے ناپاک عزائم میں کبھی کامیاب نہیں ہوں گے۔ان کا کہنا تھا کہ دہشتگردی کے مکمل خاتمے تک دہشتگردوں کے خلاف کارروائیاں جاری رہیں گی،دشمن کی ہر سازش کو ناکام بنانے کے لیے پوری قوم متحد ہے۔سپیکر نے کہا کہ ملک میں امن و استحکام کے قیام کے لیے سکیورٹی فورسز نے لازوال قربانیاں پیش کی ہیں۔ انہوں نے شہدا کے درجات کی بلندی اور زخمیوں کی جلد صحتیابی کے لیے دعابھی کی۔
