اسلام آباد(رپورٹنگ آن لائن)سپیکر قومی اسمبلی سردار ایاز صادق نے ضلع اورکزئی میں فتنہ الخوارج کے 19 دہشت گردوں کو جہنم واصل کرنے پر سکیورٹی فورسز کو خراج تحسین پیش کرتے ہوئےآپریشن میں لیفٹیننٹ کرنل جنید طارق اور میجر طیّب راحت سمیت شہید ہونے والے11 افسران و جوانوں کو خراج عقیدت پیش کیاہے۔
بدھ کو اپنے بیان میں انہوں نے کہا کہ لیفٹیننٹ کرنل جنید طارق نے لیڈنگ فرام فرنٹ کی عظیم مثال قائم کی جو پاک فوج کی روایت ہے ، پاک افواج اور سکیورٹی فورسز فتنہ الخوارج کے مکمل خاتمے کے لیے پرعزم ہیں،دہشت گردی کے خلاف جنگ میں پاک فوج کی قربانیاں رائیگاں نہیں جائیں گی۔
انہوں نے کہا کہ دہشت گرد عناصر کبھی اپنے مذموم عزائم میں کامیاب نہیں ہوں گے۔سپیکر سردار ایاز صادق نےشہدا کے اہل خانہ سے دلی تعزیت اور مکمل یکجہتی کا اظہار کیا اور دعا کی کہ اللہ شہدا ء کے درجات بلند فرمائے اور لواحقین کو صبرِ جمیل عطا فرمائے ۔ انہوں نے کہا کہ سکیورٹی فورسز نے دہشت گردی کے خلاف جنگ میں لازوال قربانیاں پیش کی ہیں، پوری قوم پاک افواج کی قربانیوں کو سلام پیش کرتی ہے۔
