کراچی (ر پورٹنگ آن لائن)روس کی یوکرائن پر حملہ کے بعد عالمی کرنسیوں کیساتھ پاکستانی روپے کی قدر بھی گر گئی جس کی وجہ سے ڈالر مزید مہنگا ہو گیا جبکہ کرپٹو کرنسی ٹریڈنگ میں بھی شدید مندی دیکھنے میں آئی ۔فاریکس ایسوسی ایشن آف پاکستان کی رپورٹ کے مطابق جمعرات کو انٹر بینک میں روپے کے مقابلے ڈالر کی قدر میں 60پیسے کا اضافہ ریکارڈ کیا گیا جس سے ڈالر کی قیمت خرید 176.15روپے سے بڑھ کر176.80روپے اور قیمت فروخت176.30روپے سے بڑھ کر176.90روپے ہو گئی.
اسی طرح مقامی اوپن کرنسی مارکیٹ میں30پیسے کے اضافے سے ڈالر کی قیمت خرید 176.70روپے سے بڑھ کر177روپے اور قیمت فروخت 177.20روپے سے بڑھ کر177.50روپے ہو گئی ۔فاریکس رپورٹ کے مطابق یورو اور برطانوی پونڈ کی قدر میں بالترتیب 2.50روپے اور2روپے کی کمی واقع ہوئی جس کے بعد یورو کی قیمت خرید 198.50روپے سے گھٹ کر 196روپے اور قیمت فروخت200.50روپے سے گھٹ کر198روپے پر آ گئی اسی طرح برطانوی پونڈ کی قیمت خرید 238.50روپے سے کم ہو کر235.50روپے اور قیمت فروخت240.50روپے سے کم ہو کر238روپے پر آ گئی ۔
