کراچی(ر پورٹنگ آن لائن)اسٹیٹ بینک کی روزگار تحفظ قرضوں کی اسکیم کے تحت اب تک 14 لاکھ 27 ہزار97ملازمین نے فائدہ اٹھالیا ہے ۔ اسٹیٹ بینک نے کورونا کے باعث پیدا ہونے والی معاشی مشکلات اور بے روزگاری روکنے کیلئے یہ اسکیم متعارف کرائی تھی ،
اسکیم کے تحت اپریل 2020 سے ستمبر کے دوران ملازمین کی تین ماہ کی تنخواہوں کیلئے پانچ فیصد شرح سود پر قرضے حاصل کیے جاسکتے ہیں۔فعال ٹیکس گزاروں کی فہرست میں شامل اداروں کو 4 فیصد کی شرح پر قرضہ لینے کی سہولت فراہم کی گئی ،اسکیم متعارف کیے جانے کے بعد فنانسنگ کے حصول کیلئے بینکوں کو بڑی تعداد میں درخواستیں موصول ہوئیں ،
اسٹیٹ بینک کے مطابق اس سکیم کے تحت 3063 کاروباری اداروں اور کمپنیوں نے 17 لاکھ 8 ہزار 156 ملازمین کے روزگار کے تحفظ کیلئے دو کھرب 35 ارب 93 کروڑ20 لاکھ روپے سے زائد کے قرضہ کیلئے درخواستیں دائر کیں،
ان میں سے 2429 اداروں اور کمپنیوں کی جانب سے ایک کھرب 83 ارب 43 کروڑ 10 لاکھ روپے تک کے قرضہ درخواستوں کی منظوری دی گئی اور یوں 14 لاکھ 27 ہزار97 ملازمین کو تحفظ فراہم کیا گیا ہے ۔
