اسلام آباد (رپورٹنگ آن لائن)وفاقی وزیرداخلہ محسن نقوی نے سکھ برادری کو بیساکھی کے تہوارکے موقع پر مبارکباد پیش کی ہے۔
اپنے بیان میں وزیر داخلہ محسن نقوی نے بیساکھی کے تہوار پر اپنے پیغام میں کہا کہ بیساکھی سکھ برادری کا خوشیوں بھراروایتی تہوار ہے اور ایک دوسرے کی خوشیوں میں شریک ہونے سے بھائی چارے اور یکجہتی کو فروغ ملتا ہے، ہم سب بیساکھی کے تہوار پر سکھ برادری کی خوشیوں میں برابر کے شریک ہیں۔ انہوں نے اس بات پر زوردیا کہ پاکستان ہم سب کا ہے اوراسے ہم نے ملکر مضبوط اور عظیم بنانا ہے۔
وزیر داخلہ محسن نقوی نے کہا کہ پاکستان میں سکھ برادری کے مقدس مقامات موجود ہیں، اقلیتوں کو بنیادی حقوق کی فراہمی، انکے جان و مال کا تحفظ اور انہیں ترقی کے یکساں مواقع فراہم کرناریاست کی ذمہ داری ہے۔ وزیر داخلہ نے واضح کیا کہ آئین پاکستان کے تحت ملک میں بسنے والی تمام اقلیتی برادریوں کو یہاں رہنے اور کام کرنے کا پورا حق حاصل ہے.
پاکستان میں سکھ برادری سمیت دیگر مذاہب کے ماننے والوں کو اپنے عقائد کے مطابق زندگی بسر کرنے کی مکمل آزادی ہے۔ انہوں نے مزید کہا کہ سکھ برادری کے گوردواروں کی دیکھ بھال، تزئین و آرائش اور سکیورٹی پر خصوصی توجہ دی گئی ہے، سکھ برادری کو مذہبی رسومات کی ادائیگی کیلئے ہرطرح کی سہولتیں فراہم کی گئی ہیں۔
