پشاور(رپورٹنگ آن لائن)وزیر اعلیٰ خیبر پختونخوا علی امین گنڈاپور کی زیر صدارت صوبائی کابینہ کے اجلاس میں اہم فیصلے کر لیے گئے۔
کے پی کابینہ نے جوڈیشل آفیسرز ویلفیئر فنڈ کے قیام کیلئے ڈرافٹ بل کی منظوری دے دی، ریگی ماڈل ٹاؤن میں جوڈیشل اکیڈمی کیلئے درکار اراضی کا فنڈ بھی منظور کر لیا۔کے پی محتسب سیکریٹریٹ میں پوسٹوں کی تخلیق کیلئے پابندی میں نرمی اور ایبٹ آباد پبلک اسکول میں آڈیٹوریم بنانے کے لیے فنڈ کی منظوری دے دی گئی۔
صوبائی کابینہ نے طالب علموں کے اسٹارٹ اپ ایوارڈ نامزدگی کے سلسلے میں مالی امداد منظور کر لی، اسٹیٹ چلڈرن انسٹی ٹیوٹ کی وسعت کیلئے جاری پراجیکٹ کے فنڈ کی منظوری بھی دی گئی۔کابینہ نے کے پی ٹریڈ ٹیسٹنگ بورڈ ڈرافٹ بل 2025ء کی منظوری دی اور نیشنل گیمز میں جانے والے خیبر پختونخوا کے کھلاڑیوں کیلئے بھی فنڈ منظور کر لیا۔اجلاس میں سی ای او فیکلٹی آف پیرامیڈیکس اینڈ الائیڈ ہیلتھ سائنسز کی تعیناتی کی بھی منظوری دی گئی۔
