اسلام آباد (رپورٹنگ آن لائن)وفاقی وزیر ریلوے محمد حنیف عباسی نے ملک کی فلاح و بہبود پر ذاتی اقتدار کو ترجیح دینے پر پی ٹی آئی پر شدید تنقید کرتے ہوئے کہا ہے کہ پی ٹی آئی کی صوبائی حکومت نے خیبرپختونخوا کے رہائشیوں کی جان، مال اور عزت کو غیر محفوظ چھوڑ رکھا ہے،خیبرپختونخوا انتظامیہ کو سیاسی ایجنڈوں سے زیادہ لوگوں کے تحفظ، سلامتی، تعلیم، صحت اور بہبود کو ترجیح دینی چاہیے۔
ایک انٹر ویو کے دوران وفاقی وزیر نے خیبرپختونخوا حکومت پر عوام کے تحفظ میں ناکامی اور صوبے میں دہشت گردوں کو سہولت فراہم کرنے کا الزام عائد کیا۔ انہوں نے کہا کہ کے پی کے کے لوگ غیر محفوظ ہیں، ان کی جان، مال اور عزت غیر محفوظ ہے جو صوبائی حکومت کی بنیادی ذمہ داری ہے۔حنیف عباسی نے وزیر اعلیٰ کے پی کے کو تنقید کا نشانہ بناتے ہوئے کہا کہ وہ عوامی فلاح و بہبود اور ترقی پر توجہ دینے کے بجائے سیاسی معاملات کے لیے اکثر دوسرے صوبوں کا دورہ کرتے رہتے ہیں اور اپنی پارٹی قیادت کے مفادات کو ترجیح دیتے ہیں۔انہوں نے زور دے کر کہا کہ اس طرح کی غفلت شہریوں کی حفاظت کو خطرے میں ڈالنے کے ساتھ ساتھ حکومت پر عدم اعتماد بھی ہے۔
وفاقی وزیر نے متنبہ کیا کہ شہری مسلسل نظر اندازی برداشت نہیں کر سکتے۔ انہوں نے اس بات پر زور دیا کہ صوبائی انتظامیہ کو سیاسی ایجنڈوں سے زیادہ لوگوں کے تحفظ، سلامتی، تعلیم، صحت اور بہبود کو ترجیح دینی چاہیے۔انہوں نے امن و امان کی بحالی اور ہر سطح پر احتساب کو یقینی بنانے کے لیے فوری کارروائی پر بھی زور دیا۔
ایک سوال کے جواب میں انہوں نے ریمارکس دیئے کہ پی ٹی آئی میں مذاکرات کرنے والا کوئی نہیں، لیڈر ہونے کا دعویٰ کرنے والے سنجیدہ نہیں اور بہت سے تو پارٹی کے حقیقی ارکان بھی نہیں ہیں۔ایک اور سوال کے جواب میں انہوں نے اسلام آباد میں مزید درخت لگانے کی حمایت کا اظہار کرتے ہوئے کہا کہ اب تک لگائے گئے درختوں کی تعداد ناکافی ہے ، شہر بھر میں بڑے پیمانے پر درخت لگانے کی مہم چلائی جائے۔
