اسلام آباد ( رپورٹنگ آن لائن)پاکستان پیپلز پارٹی کے چیئرمین بلاول بھٹو زرداری نے بنوں ریجن سمیت خیبرپختونخواہ کے مختلف علاقوں میں دہشتگردوں کے خلاف کامیاب آپریشنز پر سکیورٹی فورسز کو خراج تحسین پیش کرتے ہوئے کہا ہے کہ بزدلانہ کارروائیوں سے واضح ہے کہ بھارتی پراکسی دہشتگرد نیٹ ورک اب ہماری سکیورٹی فورسز کے ہاتھوں منطقی انجام کو پہنچ رہے ہیں۔
اپنے بیان میں بلاول بھٹو زرداری نے بنوں میں کاروائیوں میں 3 اہم کمانڈرز سمیت 17 دہشتگردوں کو جہنم رسید کرنا سکیورٹی فورسز کی اہم کامیابی قرار دیا ۔بلاول بھٹو زرداری نے بم ناکارہ بناکر شہر کو دہشتگردی سے بچانے پر بنوں پولیس کو سلام پیش کیا ۔بلاول بھٹو زرداری نے پہاڑخیل اور ڈیرہ اسمٰعیل خان میں دو الگ الگ کاروائیوں میں 13 دہشتگردوں کے خاتمے پر سکیورٹی فورسز کی پیشہ ورانہ صلاحیتوں کو سراہا ۔
بلاول بھٹو زداری نے بنوں میں امن کمیٹی پر دہشگرد حملے کی مذمت اور واقعہ میں قیمتی انسانی جانوں کے ضیاع پر اظہارِافسوس کیا ۔بلاول بھٹو زرداری نے جاں بحق افراد کی بلندی درجات اور ان کے اہل خانہ کے لیے صبر کی دعا ء کی ۔ انہوںنے کہاکہ بزدلانہ کاروائیوں سے واضح ہے کہ بھارتی پراکسی دہشتگرد نیٹ ورک اب ہماری سکیورٹی فورسز کے ہاتھوں منطقی انجام کو پہنچ رہے ہیں۔
