واشنگٹن /تہران(رپورٹنگ آن لائن )ایران کے سپریم لیڈرآیت اللہ خامنہ ای کی ویب سائٹ پر سابق امریکی صدر ٹرمپ کے قتل کی فرضی وڈیو جاری کردیاگیا،اس وڈیو کلپ میں ڈرون حملے میں سابق امریکی صدر ڈونلڈ ٹرمپ کی ہلاکت کی فرضی منظر کشی کی گئی ہے۔ادھروائٹ ہائوس کی پریس سکریٹری جین بیسکی نے ایرانی رہبر اعلی کی ویب سائٹ پر جاری وڈیو کلپ کی مذمت کرنے یا اس پر کوئی تبصرہ کرنے سے انکار کر دیا ہے۔
میڈیارپورٹس کے مطابق ایرانی رہبر اعلی علی خامنہ ای کی سرکاری ویب سائٹ پر جاری وڈیو ایک اشتعال انگیز اقدام ہے جب کہ ویانا میں ایرانی جوہری پروگرام کے حوالے سے بین الاقوامی بات چیت چل رہی ہے۔پوسٹ کی گئی وڈیو میں ایرانی عسکری ذمے داران کو جدید ترین ڈرون ٹکنالوجی کے ذریعے ٹرمپ کو نشانہ بناتے ہوئے دکھایا گیا ہے جو گولف کھیل رہے ہیں۔ گولف کھیلے جانے کی جگہ کا ماحول فلوریڈا میں ٹرمپ کے گھر سے ملتا جلتا نظر آ رہا ہے۔
