اسلام آباد (رپورٹنگ آن لائن) پیپلزپارٹی کے سیکرٹری جنرل نیر بخاری نے کہا ہے کہ حکومت کو قانون سازی بلڈوز کرنے کی کسی صورت اجازت نہیں دیں گے،حکومت اور اتحادی جماعتوں کے درمیان دراڑیں واضح طور پر نظر آنا شروع ہوگئی ہیں حکومت اور اتحادی جماعتوں کے درمیان فاصلے حکومت کے گھر جانے کا اشارہ ہے۔
اتوار کو پیپلزپارٹی کے سیکرٹری جنرل نیر بخاری نے سیاسی صورتحال سے متعلق اپنے بیان میں کہا کہ حکومتی اتحادی جماعتوں نے بھی اپوزیشن کے موقف کی تائید کردی ہے۔
نیر بخاری نے کہا کہ حکومت کو قانون سازی بلڈوز کرنے کی کسی صورت اجازت نہیں دیں گے، اپوزیشن پارلیمنٹ کے اندر اور باہر متحد ہے اور متفقہ حکمت عملی زیر غور ہے،وزیراعظم، چیئرمین سینیٹ اور اسپیکر کے خلاف تحریک سمیت تمام آپشنز موجود ہیں، اپوزیشن مشاورت کے ساتھ ملکر فیصلہ کرے گی کہ غیرآئینی حکومت کو گھر بھیجنے کے لئے کہاں سے شروعات کی جائے۔
انہوں نے مزید کہا کہ وزیراعظم، چیئرمین سینیٹ اور اسپیکر کے خلاف تحریک کا حتمی فیصلہ پارٹی قیادت کرے گی، موجودہ صورتحال سے لگ رہا ہے کہ اپوزیشن کے اقدامات سے قبل ہی حکومت گھر چلی جائے گی۔
