کوئٹہ(رپورٹنگ آن لائن)وزیر اعلی بلوچستان سرفراز بگٹی نے کہا ہے کہ حکومت افسوسناک واقعات میں ملوث عناصر کو منطقی انجام تک پہنچائے گی اور غیر معمولی حالات میں غیر معمولی اقدامات کیلئے تیار ہے، ریاست کی رٹ کو ہر صورت قائم رکھا جائے گا، بدامنی اور انتشار پھیلانے والوں کو کسی صورت معاف نہیں کیا جائے گا۔ ۔
تفصیل کے مطابق وزیراعلی بلوچستان سرفراز بگٹی نے سینٹرل پولیس آفس کا دورہ کیا جہاں انہیں موسی خیل، قلات، بولان، بیلہ، کھڈ کوچہ، نوشکی کی سیکیورٹی صورتحال پر بریفنگ دی گئی۔اس موقعے پر وزیراعلی بلوچستان سرفراز بگٹی نے کہا کہ سی ٹی ڈی، پولیس، لیویز کو جدید آلات، ساز و سامان سے لیس کیا جائیگا، حکومت غیر معمولی حالات میں غیر معمولی اقدامات کیلئے تیار ہے۔
وزیر اعلی نے ہدایت جاری کی کہ قانون نافذ کرنے والے ادارے سیکیورٹی کا جامع پلان مرتب دیں، کسی بھی افسوسناک واقعے کی صورت میں موثر اور فوری رد عمل دیا جائے، شاہراہوں کی حفاظت کے لئے گشت کو بڑھایا جائے۔سرفراز بگٹی کا کہنا تھا کہ حکومت افسوسناک واقعات میں ملوث عناصر کو منطقی انجام تک پہنچائے گی، دہشت گردوں اور ان کے سہولت کاروں کو کیفر کردار تک پہنچایا جائے گا، بے گناہ اور معصوم لوگوں کو نشانہ بنانے والے کسی رعایت کے مستحق نہیں ہیں۔
سرفراز بگٹی کا کہنا تھا کہ ریاست کی رٹ کو ہر صورت قائم رکھا جائے گا، بدامنی اور انتشار پھیلانے والوں کو کسی صورت معاف نہیں کیا جائے گا۔
