اسلام آ باد (رپورٹنگ آن لائن) امیر جماعت اسلامی سراج الحق نے کہا ہے کہ حکمرانوں کو عوام کو ریلیف دینا پڑے گا یا پھر انھیں گھر بھیجیں گے، دنیا مصنوعی سورج کے تجربات کر رہی ہے اور ہم صدارتی نظام کی بحث میں الجھے ہوئے ہیں ، ملک میں صدارتی نظام کی بحث حکومت نے اپنی نالائقیوں پر پردہ ڈالنے کے لیے شروع کی۔
سراج الحق نے اپنے جاری کردہ بیان میں کہا کہ پارلیمانی اور صدارتی نظام آزما لیے اب پاکستان کو اسلامی نظام چاہیے، آئین پر اس کی روح کے مطابق عمل ہوتا تو تمام مسائل حل ہو چکے ہوتے۔ انکا کہنا ہے کہ اللہ اور رسول کے حکم کے متصادم نظام، ریاست مدینہ نہیں ریاست بد دینہ ہے، حکومت ریاست مدینہ کے نام پر سیکولر ایجنڈا کو بڑھاوا دے رہی ہے۔
امیر جماعت اسلامی نے مزید کہا کہ سودی معیشت کا اسلامی ریاست سے کیا لینا دینا؟ سراج الحق نے کہا کہ پی ٹی آئی حکومت ملکی تاریخ کا ناکام ترین سیٹ اپ ہے، پی ٹی آئی کی ملک دشمن پالیسیوں کے خلاف ملک گیر احتجاج ہو گا۔
