اسلام آباد (رپورٹنگ آن لائن)چیئرمین سینٹ سید یوسف رضا گیلانی نے کہا ہے کہ حق خود ارادیت مقبوضہ کشمیر کے عوام کا بنیادی حق ہے، پاکستان کشمیری عوام کی عالمی و علاقائی فورمز پر سیاسی ، سفارتی اور اخلاقی حمایت جاری رکھے گا ، عالمی برادری تنازعہ کشمیر اور فلسطین کو حل کرانے کیلئے کردار ادا کرے۔
سینیٹ سیکرٹریٹ میڈیا ڈائریکٹوریٹ کی جانب سے یوم سیاہ کشمیر کے موقع پر اتوار 27 اکتوبر 2024 کو جاری خصوصی پیغام میں یوسف رضا گیلانی نے کہا کہ 27 اکتوبر 1947 کو مقبوضہ کشمیر میں بھارتی افواج کا غیر قانونی اور انتہائی شرمناک اقدام تھا ،27 اکتوبر کو تاریخ میں ہمیشہ سیاہ دن کے طور یاد رکھا جائے گا۔ چیئرمین سینٹ نے کہا کہ آج کا دن مقبوضہ کشمیر میں بھارت کے غاصبانہ قبضے اور کشمیری عوام پر ڈھائے جانے والے مظالم کی داستان کو بے نقاب کرنے کا دن ہے۔ انہوں نے کہا کہ حق خود ارادیت مقبوضہ کشمیر کے عوام کا بنیادی حق ہے،مقبوضہ جموں و کشمیر کے عوام نے حق خود ارادیت کے حصول کے لیے لازوال قربانیاں پیش کی ہیں ۔
سید یوسف رضا گیلانی نے مزید کہا کہ بھارت کی جانب سے کشمیری عوام کے حق خود ارادیت کو ظلم و بربریت سے دبانے کی ہر کوشش ناکام رہی ہے، بھارت کے آئین میں تبدیلی اور جعلی انتخاب کو مقبوضہ جموں و کشمیر کی عوام نے بری طرح ناکام بنا دیا ہے۔ چیئرمین سینیٹ نے کہا کہ پاکستانی قوم کشمیر ی عوام کی حق خود ارادیت کی تحریک کی حمایت اور ان سے مکمل یکجہتی کا اظہار کرتی ہے۔
سید یوسف رضا گیلانی نے کہا کہ خطے میں پائیدار امن کے قیام کیلئے مسئلہ کشمیر کا اقوام متحدہ کی قراردادوں اور کشمیری عوام کی امنگوں کے مطابق حل ناگزیر ہے،پاکستان کشمیری عوام کی عالمی و علاقائی فورمز پر سیاسی ، سفارتی اور اخلاقی حمایت جاری رکھے گا ،گزشتہ 7 دہائیوں سے ذیادہ عر صے سے مقبوضہ کشمیر کی عوام کو بدترین ریاستی دہشتگردی کا نشانہ بنا یا جا رہا ہے۔ چیئر مین سینیٹ سید یوسف رضا گیلانی نے کہا کہ عالمی برادری تنازعہ کشمیر اور فلسطین کو حل کرانے کیلئے کردار ادا کرے۔ اپنے پیغام کے آخر میں انہوں نے کشمیر کی تحریک آزادی کے ہیروز کو خراج عقیدت بھی پیش کیا۔
