مقبوضہ بیت المقدس(رپورٹنگ آن لائن)فلسطینی صدر محمود عباس نے اعلان کیا ہے کہ جنگ کے بعد غزہ کی مکمل ذمے داری فلسطینی اتھارٹی کے پاس ہو گی، جسے عرب اور عالمی حمایت حاصل ہو گی۔
جنگ کے اگلے روز حماس کی کوئی حکمرانی نہیں ہو گی۔ عباس نے پیر کے روز ایک بار پھر زور دیا کہ غزہ فلسطینی ریاست کا ناقابلِ تقسیم حصہ ہے۔نیویارک میں بین الاقوامی کانفرنس کے صدر کو ارسال کردہ اپنے پیغام میں عباس نے کہا کہ حماس کو اپنا اسلحہ فلسطینی اتھارٹی کے حوالے کرنا ہو گا، کیونکہ ہم ایک غیر مسلح ریاست چاہتے ہیں۔
انھوں نے واضح کیا کہ جنگ کے خاتمے کے ایک سال کے اندر صدارتی اور پارلیمانی انتخابات کی تیاری کی جا رہی ہے۔ عباس کے مطابق ہر جماعت یا امیدوار جو انتخابات میں حصہ لینا چاہتا ہے اسے فلسطین لبریشن آرگنائزیشن (پی ایل او)کے سیاسی پروگرام، بین الاقوامی وعدوں، عالمی قانونی جواز اور ایک اتھارٹی، ایک قانون اور ایک قانونی سکیورٹی فورس کے اصول کو ماننا ہو گا۔
