لاہور( ر پورٹنگ آن لائن)جنوبی افریقہ کی کرکٹ ٹیم اپنے ایک ماہ قیام کے دوران پاکستان میں نو کوویڈ 19 ٹیسٹ کروائے گی۔ پاکستان کرکٹ بورڈ (پی سی بی) کے ایک عہدیدار نے کہا ہے کہ کھلاڑیوں کی حفاظت کو یقینی بنانے کے لئے وسیع پیمانے پر جانچ کی جا رہی ہے۔ پی سی بی عہدیدار کا کہنا تھا کہ ہوم سیریز سے وابستہ تمام افراد کو بائیو سیکیور ببل میں رہنا ہوگا اور تمام احتیاطی تدابیر پر عمل کرنا پڑے گا۔جنوبی افریقی کرکٹ ٹیم کے پاکستان پہنچنے کے بعد 6 دن کے قرنطینہ میں 3 کرونا ٹیسٹ ہوں گے ۔ اس کے بعد ہر ٹیسٹ میچ سے پہلے اور اس کے بعد اور تین میچوں کی ٹی ٹونٹی سیریز کے دوران مزید کرونا ٹیسٹ ہوں گے۔ مہمان ٹیم کا پہلا ٹیسٹ 16 جنوری، دوسرا جنوری اور تیسرا 22 جنوری کو لیا جائے گا۔اس کے بعد دونوں ٹیموں کا پہلے ٹیسٹ سے پہلے اور بعد میں بھی کورونا ٹیسٹ کیا جائے گا۔کرونا ٹیسٹ لینے کا یہ سلسلہ ٹی ٹونٹی سیریز کے اختتام تک جاری رہے گا۔ دوسری طرف پاکستانی کھلاڑی 7 کوویڈ-19 ٹیسٹوں میں سے گزریں گے جن میں سے 5 بائیو سیکیور ببل میں قیام کے دوران ہوں گے۔ بائیو سیکیور ببل میں داخل ہونے سے پہلے کھلاڑیوں کا 2 بار ٹیسٹ کیا جائے گا۔ قومی ٹیم 26 جنوری سے 14 فروری تک جنوبی افریقہ کے خلاف کراچی اور راولپنڈی میں 2 ٹیسٹ اور لاہور میں 3 ٹی ٹونٹی کھیلے گا۔
