لاہور(رپورٹنگ آن لائن)جنرل ہسپتال کی سٹیٹ آف دی آرٹ اور جدید مشینری سے لیس سنٹرل ریسرچ لیب میں گزشتہ 14ماہ کے دوران کورونا کے تشخیصی56,300مفت ٹیسٹ ہوئے جس کیلئے وزیر اعلیٰ پنجاب سردار عثمان بزدار اور صوبائی وزیر صحت ڈاکٹر یاسمین راشد کی خصوصی دلچسپی سے صوبائی حکومت نے خطیر فنڈز و وسائل فراہم کئے اور اتنی بڑی تعداد میں کورونا ٹیسٹ ممکن ہو سکے ۔
پرنسپل پوسٹ گریجویٹ میڈیکل انسٹی ٹیوٹ پروفیسر ڈاکٹر سردار محمد الفرید ظفر نے بتایاکہ نجی شعبے میں ان ٹیسٹوں کی فیس کی مالیت 36کڑور روپے سے زائد بنتی ہے لیکن صوبائی حکومت کی پالیسی کے تحت ایل جی ایچ میں کسی فرد کی ایک پائی بھی خرچ نہیں ہوئی۔ اس موقع پر ڈائریکٹر ریسرچ لیب پی ایچ ڈی ہولڈر ڈاکٹر غزالہ روبی کا کہنا تھا کہ عالمی ادارہ صحت نے کورونا کی تشخیص کیلئے جدید پی سی آر مشین کے علاوہ کٹس بھی فراہم کیں جن کی مدد سے کورونا وائرس کی مختلف اقسام کی تشخیص اورتجزیاتی رپورٹیںممکن ہو سکیں۔
اس موقع پر ایم ایس ڈاکٹر عبدالرزاق ، ڈاکٹر لیلیٰ شفیق ،ڈاکٹر عرفان ملک، ڈاکٹر عبدالعزیز و دیگر بھی موجود تھے۔ پروفیسر الفرید ظفر نے کہا کہ جنرل ہسپتال کے ڈاکٹرز ، نرسز اور پیرا میڈیکس نے اپنی پیشہ وارانہ خدمات احسن طریقے سے سرانجام دیتے ہوئے اپنی جانوں کو خطرے میں ڈال کر مہلک وبا میں مبتلا مریضوں کا علاج ممکن بنایا جو طب کی تاریخ میں ہمیشہ یاد رکھا جائے گا۔ انہوں نے لوگوں سے اپیل کی کہ کورونا وائرس سے بچنے کیلئے ویکسینیشن لازمی کروائیں تاکہ ماہرین کے مطابق چوتھی لہر کے خطرات کو کم سے کم کیا جا سکے۔
انہوں نے کہا کہ شہریوں کو چاہیے کہ وہ ویکسین لگوانے کے باوجود احتیاطی تدابیر اور فیس ماسک کا استعمال یقینی بنائیں ۔ پرنسپل پی جی ایم آئی نے نوجوان نسل پر زور دیا کہ وہ اپنے ضعیف العمر بزرگوں کی ویکسینیشن کروانے میں تاخیر نہ برتیں۔ انہوں نے پی جی ایم آئی ، امیر الدین میڈیکل کالج ، نرسنگ کالج ، الائیڈ ہیلتھ سائنسز سکول کے طلباء وطالبات سے کہا کہ وہ عوام میں ویکسینیشن کی افادیت کے بارے میں شعور اجاگر کریں کیونکہ دور جدید میں سوشل میڈیا ہر گھر تک معلومات کی رسائی و فراہمی کیلئے موثر ذریعہ ہے لہذا اس سلسلے میں ہر شخص کو آگاہی کیلئے اپنا اپنا کردار ادا کرنا ہوگا۔
پروفیسر الفرید ظفر نے کہا کہ پنجاب حکومت نے شعبہ صحت کی ترقی کیلئے آئندہ مالی سال کے بجٹ میں 370ارب روپے مختص کئے ہیں۔ نئے ہسپتالوں کی تعمیر سے لوگوں کو معیاری طبی سہولیات فراہم ہونگی۔ان کا مزید کہنا تھا کہ ضلعی سطح پر طبی و تشخیصی سہولیات میں اضافے سے ٹیچنگ ہسپتالوں پر لوڈ کم ہو گا اور لوگوں کو بروقت طبی سہولیات میسر آسکیں گی اور انہیں بیماریوں سے چھٹکارا ملے گا ۔
