لاہور(زاہد انجم سے) پرنسپل پوسٹ گریجویٹ میڈیکل انسٹیٹیوٹ و امیرالدین میڈیکل کالج، پروفیسر ڈاکٹر محمد فاروق افضل کی متحرک قیادت میں جنرل ہسپتال نے طبی میدان میں ایک اہم سنگِ میل عبور کر لیا ۔ ہسپتال میں تقریباً ایک دہائی کے طویل تعطل کے بعد قرنیہ کی پیوند کاری (Corneal Transplant) کے آپریشنز کا باقاعدہ دوبارہ آغاز کر دیا گیا ہے۔
گزشتہ روز جنرل ہسپتال کے آئی یونٹ میں دو مستحق مریضوں کے قرنیہ کی کامیاب پیوند کاری کی گئی۔ اس موقع پر پرنسپل پی جی ایم آئی پروفیسر ڈاکٹر محمد فاروق افضل,اور ایم۔ایس پروفیسرفریاد حیسن نے اس کامیابی کو ہسپتال کے لیے ایک تاریخی سنگِ میل قرار دیتے ہوئے جنرل ہسپتال، پی جی ایم آئی اور امیرالدین میڈیکل کالج کی پوری ٹیم کو مبارکباد دی۔
انہوں نے کہا کہ آنکھیں اللہ تعالیٰ کی عظیم نعمت ہیں جن کے ذریعے انسان اس دنیا کے حسین نظاروں سے لطف اندوز ہوتا ہے۔ قرنیہ کی پیوند کاری جیسی پیچیدہ اور اہم سہولت کی بحالی دراصل ان افراد کے لیے نئی زندگی کا آغاز ہے جو برسوں سے بینائی کی نعمت سے محروم تھے۔ اس اقدام سے نہ صرف سینکڑوں مستحق اور غریب مریض دوبارہ اپنی آنکھوں سے دنیا دیکھ سکیں گے بلکہ یہ انسانیت کی خدمت، دکھی انسانوں کے لیے امید اور معاشرے کے لیے ایک روشن مثال بھی ثابت ہو گا۔
