اسلام آباد (رپورٹنگ آن لائن)وزیراعظم محمد شہباز شریف نے کہا ہے کہ جناح میڈیکل کمپلیکس منصوبہ نہ صرف پاکستان بلکہ پورے خطے میں صحت کے شعبے کا ایک مثالی منصوبہ ہو گا۔
پیر کو وزیراعظم آفس کے میڈیا ونگ سے جاری بیان کے مطابق انہوں نے ان خیالات کا اظہار جناح میڈیکل کمپلیکس (جے ایم سی) کے بورڈ کے اجلاس کی صدارت کرتے ہوئے کیا۔اجلاس میں بورڈ کے ارکان اور متعلقہ اداروں کے اعلیٰ افسران بھی موجود تھے۔ وزیراعظم نے کہا کہ جناح میڈیکل کمپلیکس ہم سب کی مشترکہ کوششوں سے عنقریب مکمل ہو گا،یہ منصوبہ نہ صرف پاکستان بلکہ اس پورے خطے میں صحت کے شعبے کا ایک مثالی منصوبہ ہو گا۔
وزیراعظم نے جناح میڈیکل کمپلیکس کی تعمیر کے مختلف مراحل میں تکنیکی تعاون فراہم کرنے پر آغا خان فائونڈیشن سے اظہار تشکر کیا۔وزیر اعظم نے ہدایت کی کہ جناح میڈیکل کمپلیکس کے علاج معالجے کے تمام مجوزہ مراکز پر کام تیز کیا جائے۔اجلاس میں جے ایم سی کے بورڈ نے جناح میڈیکل کمپلیکس کے منصوبے کی تعمیر کے تمام مراحل میں وزیراعظم کی جانب سے مسلسل تعاون اور راہنمائی پر ان کا شکریہ ادا کیا۔
اجلاس کو بتایا گیا کہ جناح میڈیکل کمپلیکس میں نہ صرف طبی خدمات بلکہ بین الاقوامی معیار کی طبی تربیت، تعلیم اور تحقیق کے لیے درکار سہولیات کی فراہمی پر کام تیزی سے جاری ہے،جناح میڈیکل کمپلیکس کو عالمی معیار کے مطابق لانے کے لیے جدید ٹیکنالوجی کے ذریعے تحقیق اور آرٹیفیشل انٹیلی جنس اور روبوٹکس کا استعمال کیا جائے گا۔
